Դեռևս մարտ ամսին Բուդապեշտում ադրբեջանցի ոճրագործ Ռամիլ Սաֆարովի կողմից կացնահարված հայ սպա Գուրգեն Մարգարյանի իրավահաջորդները և մահափորձի ենթարկված սպա Հայկ Մակուչյանի ներկայացուցիչները Մարդու իրավունքների եվրոպական դատարան բողոք էին ներկայացրել Ադրբեջանի և Հունգարիայի դեմ: Տուժողների ներկայացուցիչներն առ այսօր պնդում են, որ Հունգարիայի կողմից ոճրագործ Ռամիլ Սաֆարովի արտահանձնումը, Ադրբեջանում նրան ներում շնորհելը խախտում են Մարդու իրավունքների եվրոպական կոնվենցիայի երկու հոդված՝ 2-րդ հոդվածը՝ կյանքի իրավունք, և 14-րդ հոդվածը՝ խտրականության արգելք:
«Առաջին լրատվական»-ի հետ զրույցում Գուրգեն Մարգարյանի ընտանիքի շահերի ներկայացուցիչ, փաստաբան Նազելի Վարդանյանը տեղեկացրեց, որ իրենց բողոքը ՄԻԵԴ-ում ստացել են, քանի որ այդ մասին պատասխան ստացել են դատարանից: Սակայն, նրա հավաստիացմամբ, դեռևս տեղեկատվություն չկա՝ գործը վարույթ ընդունե՞լ են, թե՞ ոչ:
«ՄԻԵԴ ուղարկված բողոքը մինչև վարույթ է ընդունվում՝ տարիներ են տևում: Չենք բացառում, որ այլ բողոքների համեմատ այս բողոքն ավելի շուտ վարույթ կընդունեն, բայց էլի մեկ-մեկուկես տարի կտևի: Մեր դիմումը ՄԻԵԴ-ը ստացել է՝ միայն այդ մասին գիտենք, բայց դրանից հետո ՄԻԵԴ-ից որևէ բան չենք ստացել: Վարույթ ընդունելու մասին որոշումը պետք է ուղարկեին, եթե նման որոշում լիներ»,- տեղեկացրեց Նազելի Վարդանյանը:
Հիշեցնենք, որ 2004 թվականի փետրվարի 19-ին Բուդապեշտում ադրբեջանցի սպա Ռամիլ Սաֆարովը քնած ժամանակ կացնահարել էր Հայաստանի ԶՈւ սպա Գուրգեն Մարգարյանին: Երկու սպաները Հունգարիայի մայրաքաղաքում մասնակցում էին անգլերեն լեզվի դասընթացներին՝ ՆԱՏՕ-ի ծրագրի շրջանակում: 2006թ. ապրիլի 3-ին Բուդապեշտի դատարանը մարդասպան Սաֆարովին դատապարտել էր ցմահ ազատազրկման` 30 տարվա ընթացքում առանց ներման իրավունքի: Սակայն 2012թ. օգոստոսի 31-ին հունգարական կառավարությունը ցմահ ազատազրկման դատապարտված Սաֆարովին արտահանձնեց Ադրբեջան, որտեղ էլ Սաֆարովին անմիջապես ներում շնորհեցին և հերոսացրին:
