Հանրապետության հրապարակի վերաբերյալ հայտարարված մրցույթի շուրջ կրքերը դեռ չհանդարտված՝ քաղաքապետ Տարոն Մարգարյանն այսօր հայտարարել է, որ երկուշաբթի օրվանից մրցույթներ են հայտարարվեու նաև մայրաքաղաքի մյուս հրապարակների վերաբերյալ:
«Մենք ոչ միայն Հանրապետության հրապարակի մասով ենք բաց մրցույթ հայտարարել, երկուշաբթի մենք կհայտարարենք արդեն քաղաքապետարանի դիմացի հրապարակի, Ֆրանսիական հրապարակի, Բրազիլական հրապարակի և ծայրամասերի մի շարք հրապարակների բաց մրցույթ»:
Նա նաև խորհուրդ է տվել վատ չվերաբերվել այդ գաղափարին և վստահեցրել, թե երևացիների կարծիքն անպայման հաշվի է առնվելու:
«Մրցույթը կարող է արդյունք չտալ, կարող է այն արդյունքը տալ, որ ընդունելի լինի մեր երևանցիների կողմից: Վստահեցնում եմ, բացի ճարտարապետների մասնագիտական կարծիքից՝ նաև լինելու է երևանցիների կարծիքը»,- հայտարարել է Տարոն Մարգարյանը:
Ինչ վերաբերում է ծրագրի ֆինանսական կողմին, քաղաքապետը հայտարարել է. «Այն իրականացվելու է ոչ միայն քաղաքապետարանի բյուջեյով, այլ մասնավորի ներդրմամբ»:
Իսկ բուն շինարարությունը, քաղաքապետի խոսքով կմեկնարկի, երբ կլինի դրա ֆինանսական հնարավորությունը:
«Մրցույթը կայանալու դեպքում դա չի նշանակում, թե հենց հաջորդ օրը քայլեր են ձեռնարկվելու այդտեղ: Դա ընդամենը կարծիքներ ձևավորելու համար է: Փաթեթներ կձևավորվեն, կարծիքներ կձևավորվեն և այն ժամանակ, երբ որ երևանցիները իրենց համաձայնությունը կտան, բոլոր ՀԿ-ները իրենց համաձայնությունը կտան, և երբ որ կունենանք հնարավորություն, կիրականացնենք»,- ասել է Տարոն Մարգարյանը:
Անդրադառնալով հնչող մասնագիտական քննադատություններին՝ Տարոն Մարգարյանը հիշեցրել է, թե երկու տարի առաջ, երբ անցկ է ացվել նույն մրցույթը, չի քննադատվել: Ավելին, քաղաքապետը նշել է նաև. «Կան արձանագրություններ, կան մարդիկ, որոնք այդ արձնագրությունների տակ ստորագրել են, որ իրենք համաձայն են բաց մրցույթ լինելուն, և այսօր քննադատում են այդ մրցույթը»:
Քաղաքապետը, սակայն, չի ցանկացել կոնկրետ անուններ տալ:
