Թուրքական Գեզի այգում ծառահատման դեմ բողոքող ցույցի մասնակիցները մայիսի 31-ին ստիպված են եղել պաշտպանվել ոստիկանության կողմից գործադրված ուժի կիրառման դեմ: Այս մասին հաղորդել է «Արդարություն և զարգացում» կուսակցության անդամ, վարչապետ Ռեջեփ Թայիփ Էրդողանի կողմնակիցներից՝ Մութլու Ալքանը:
Նրա խոսքերով՝ կուսակցության ղեկավարությունը գիտակցում է, որ անվտանգության ուժերը անհամաչափ ուժ են կիրառել ցուցարարներին ցրելու համար:
«Այգում հավաքվել էին իսկապես շրջակա միջավայրով մտահոգ մարդիկ: Իմ կարծիքով՝ դա ոչ մի խնդիր չէր առաջացնում, քանի որ պահանջներ ներկայացնելը մարդկանց ժողովրդավարական իրավունքն է»,- նշել է նա:
«Սակայն հետագայում բողոքի ակցիայի մասնակիցներին ցրել են՝ կիրառելով ավելորդ ուժ: Դա մեծացրել է բողոքի ակցիան: Առանց ոստիկանության կողմից այդպիսի միջամտության իրավիճակը շատ ավելի հանգիստ կլիներ այժմ»,- ընդգծել է ITAR-TASS-ի զրուցակիցը:
Նրա հաղորդմամբ՝ դեպքի մանրամասները հետաքննվում են:
