Ադրբեջանական Salam News գործակալությանը տված հարցազրույցի ժամանակ Վրաստանի Լեյբորիստական կուսակցության նախագահ, պատգամավոր Շալվա Նատելաշվիլին անդրադարձ է կատարել Ադրբեջանում պետական հեղաշրջման մասին պտտվող լուրերին.
«Բրայզան մեկ անգամ չէ, որ իր գործողություններով վնաս է պատճառել Վրաստանին, իսկ այժմ կործանում է Ադրբեջանը: Պարոն Բրայզայի մասնագիտությունը հեղաշրջումներ իրականացնելն է: Դրա վառ վկայություններն են Սաակաշվիլին` Վրաստանում, Յուշչենկոն` Ուկրաինայում և Բակիևը` Ղրղզստանում: Ճիշտ է` վերջին երկուսն արդեն գահընկեց են արվել, սակայն ժամանակին հենց Բրայզան է նրանց բերել իշխանության գլուխ:
2003 թվականի աշնանային ընտրություններում Բրայզային չհաջողվեց նույնն անել Ադրբեջանում, թեև նա այդպիսի փորձ ձեռնարկեց: Ի դեպ, Բրայզան կապված է Ջոն Մաքքեյնի գլխավորած ամենապահպանողական շրջանակներին:
Բրայզայի ներկայիս թիմի մեջ են մտնում նաև Վրաստանի նախագահ Միխեիլ Սաակաշվիլին, Ազգային անվտանգության խորհրդի քարտուղար Բոկերիան, Վրաստանի ՆԳՆ Մերաբիշվիլին, Արդարադատության նախարար Ադեիշվիլին:
Ադրբեջանում, Վրաստանում ու Հայաստանում «գունավոր հեղափոխությունների» նախագիծը մշակվել է դեռևս մի քանի տարի առաջ: Այն սկսեց զարգացում ապրել Բուշի ժամանակ և կոչվում էր Արևելքի ժողովրդավարացման առաջխաղացման նախագիծ:
Վրաստանում, Ուկրաինայում ու Ղրղզստանում տեղի ունեցած «գունավոր հեղափոխություններից» հետո ԱՄՆ-ում ստեղծվեց «Անցումային ժողովրդավարությունների նախագիծ» հասարակական կազմակերպությունը, որի նախագահը ԱՄՆ պետդեպարտամենտի կայունության ու վերակառուցման բաժնի կոորդինատոր Կառլոս Պասկուալն էր:
2005 թվականին նա հայտարարեց «առավել անկայուն ու ռիսկային» երկրների ևս մեկ ցուցակի ի հայտ գալու մասին: Այդ ժամանակ նա բացատրեց, որ ԱՄՆ-ի հետախուզական ծառայությունները յուրաքանչյուր 6 ամիսը մեկ պետք է թարմացնեն 25 երկրներից բաղկացած այդ ցանկը, որոնցում տիրող իրավիճակը կարող է հանգեցնել ամերիկյան միջամտությանը:
Այս կառույցին հատկացվել են միլիարդավոր դոլարներ այդ երկրներում «գունավոր հեղափոխություններ» կազմակերպելու համար: Մաքքեյնի խումբը. Բրայզան, Ֆրիդը, Բրյուս Ջեքսոնը միլիոնավոր, եթե ոչ միլիարդավոր դոլարներ են ծախսել այդ արկածախնդրության վրա: Բաքվում ու Երևանում դա անել չհաջողվեց, իսկ Թբիլիսիում հաջողվեց, ինչի պատճառը Շևարդնաձեի անգործությունն էր, որն արկածախնդիրներին հանձնեց իշխանությունը` իր անձի ու ունեցվածքի անձեռնմխելիության դիմաց»:
Հիշեցնենք, որ մարտի վերջին Նաթելաշվիլին հայտարարել էր. «Վրաց ժողովուրդը պետք է իմանա, թե ով է Սաակաշվիլիի հովանավորը: Եթե ամերիկյան օրենսդիր մարմինը շարունակի Սաակաշվիլիի օգտին լոբբիստական աշխատանքներ տանել, ապա մենք ստիպված կլինենք բողոքի ակցիաներ կազմակերպել Սպիտակ տան և ՄԱԿ-ի գրասենյակների առջև` դրանով իսկ արթնացնելով Արևմուտքին»: