Ամերիկյան Apple ընկերությունը հունիսին գործարկում է ծրագիր, որի շրջանակում հնարավոր կլինի iPhone-ի հնացած տարբերակները փոխարինել շարքի նոր սարքերով: Ինչպես հայտնում է Mercury News-ը, դա կարող է կապված լինել սարքի նոր տարբերակի առաջիկա ներկայացման ծրագրերի հետ: Մի շարք աղբյուրների փոխանցմամբ՝ նորույթը կարող է հայտնվել արդեն հունիսին:
Նշվում է, որ հին սարքերը նորով փոխարինելու համար պետք է վճարել դրանց միջև եղած գնային տարբերությունը: iPhone 5-ի ամենահասարակ մոդելը, առանց կապի օպերատորի հետ պայմանագրի և առանց հարկերի հաշվարկի, արժե 649 դոլար:
Փորձագետների կարծիքով՝ այդ քայլը թույլ կտա ծածկել հնարավոր վնասները iPhone 4-ի և iPad 2-ի՝ ԱՄՆ ներմուծման արգելքի պատճառով: Տարբեր հաշվարկներով՝ կորուստները կարող են կազմել 680 մլն դոլար:
Հիշեցնենք, որ երեքշաբթի Միջազգային առևտրի հարցերով դաշնային հանձնաժողովը հայտարարել էր ներմուծման արգելքի մասին՝ կապված այդ սարքերում օգտագործված մի շարք գյուտերի հետ, որոնց իրավունքը պատկանում է հարավկորեական Samsung Elecronics-ին:
ԱՄՆ նախագահ Բարաք Օբաման կարող է 60 օրվա ընթացքում իր իշխանությամբ կասեցնել այդ որոշումը:
