Ֆրանսիայի ազգային ժողովը ապրիլի 28-ն կքննարկի հակառուսական պատժամիջոցների չեղարկման հարցը։ Այս մասին RIA Novosti-ի հետ հարցազրույցում ասել է ֆրանսիացի խորհրդարանական Ֆրանսուա Ռոշեբլուանը։
«Ապրիլի 28-ին Ֆրանսիայի Ազգային ժողովում կանցկացվի Ռուսաստանի դեմ պատժամիջոցները հանելու վերաբերյալ առաջին քվեարկությւնը»,- ասել է նա՝ չհստակեցնելով, թե կոնկրետ ինչ պատժամիջոցների մասին է խոսքը։
Ռոշեբլուանը նշել է, որ այդ հարցը քննարկելու առաջարկով հանդես է եկել ժողովում հանրապետականների խումբը։
«Եթե ժողովը նման որոշում ընդունի, դա ցույց կտա Ֆրանսիայի դիրքորոշումը»,- ասել է խորհրդարանականը՝ հավելելով, որ «ԵԽԽՎ-ում դա ոչինչ չի փոխի»։
Հունվարի վերջին Ֆրանսիայի գյուղատնտեսության նախարարը նույնպես հայտնել էր Ռուսաստանից ԵՄ պատժամիջոցները հանելու Փարիզի ցանկության մասին։
Ներկայումս Ռուսաստանի դեմ գործում է ԵՄ պատժամիջոցների երեք փաթեթ։ Առաջին փաթեթում անհատական պատժամիջոցներն են Ռուսաստանի և Ուկրաինայի քաղաքացիների դեմ, որոնք երկարացվել են անցած շաբաթվա վերջին։ Մյուս փաթեթը վերաբերում է ոլորտային սահմանափակող միջոցառումներն, որոնք կգործեն մինչև 2016 թվականի հուլիսի 31-ը, իսկ Ղրիմի դեմ պատժամիջոցները՝ մինչև 2016 թվականի հունիսի 23-ը։
