Երեւանի պետական տնտեսագիտական համալսարանի ոսխորհրդի ՀՀԿ-ական նախագահ Սևակ Խաչատրյանի գնահատմամբ, Հայաստանում այսօր երիտասարդները ավելի ակտիվ են. «Շատացել են երիտասարդական կազմակերպությունները, խորհրդարանական կուսակցությունների երիտասարդական թեւերը, ինչպես նաեւ ուսխորհուրդները շատ կարեւոր դեր են զբաղեցնում: Վերջին տարիներին բավականին շատացել են երիտասարդական հավաքները»:
Սևակի խոսքերով, ուսանողական խորհուրդները մեծ ազդեցություն ունեն բուհի որոշումների վրա, քանզի բոլոր կառավարման օղակներում 25 տոկոս մասնակցություն ունեն եւ որպես ուսանող իրենց ձայնը լսելի է:
Այսօր բոլոր կուսակցություններում կա երիտասարդացման միտում, սակայն իրավիճակը ցույց է տալիս, որ կուսակցության երիտասարդ անդամները ոչ թե գաղափարական, մոտեցումների առումով են նոր որակ տալիս կուսակցությանը, այլ պարզապես` տարիքային: ԵՊՏՀ-ի ՈւԽ նախագահը համաձայն է այդ դիտարկման հետ. «Շատ երիտասարդներ այսօր կուսակցական են դառնում կարիերա ստեղծելու համար, սակայն մեծ են նաեւ գաղափարական առումով կուսակցության շարքերը անդամագրվողների թիվը»:
Պետական բուհերի ուսանողական խորհրդի անդամների, մասնավորապես ՈւԽ նախագահների կուսակցական լինելու հանգամանքը, ըստ Սևակի, չի անդրադառնում մյուս ուսանողների վրա. «Ես, կուսակցական լինելով, փորձում եմ այնպես անել, որ իմ գաղափարները չազդեն մյուսների վրա: Իսկ ես, որպես երիտասարդ, իրավունք ունեմ լինելու ցանկացած կուսակցության անդամ եւ ցանկացած տեղ հանդես գալ որպես կուսակցական»:
Սևակը եւս այն կարծիքին է, որ պետությունն այսօր բավականաչափ ուշադրություն չի հատկացնում ուսանողներին, սակայն հույս ունի, որ մոտական երկու տարում երիտասարդների առջեւ ծառացած խնդիրները կլուծվեն:
