Անդրադառնալով ԴԱՀԿ ծառայության ղեկավար Միհրան Պողոսյանի հրաժարականին՝ «Առաջին լրատվական»- ի հետ զրույցում ՀՅԴ խմբակցության քարտուղար Աղվան Վարդանյանը նշեց, որ այդ քայլը իշխանության ներսում ինքնամաքրման գործընթաց չի համարում և հավելեց, որ հրաժարական տալը լավ ավանդույթ է. «Կարծում եմ, որ նորմալ, քաղաքակիրթ երկրներում եթե որևէ պաշտոնյայի անուն է շոշափվում այս կամ այն սկանդալի մեջ, ճշգրիտ մոտեցումը հրաժարական տալն է և սպասելը քննության ավարտին, վերջնական գնահատականներին»:
Նրա խոսքով՝ ակնհայտ է, որ Հայաստանում բազմաթիվ մարդիկ կան, որոնք կարող էին հրաժարական տալ տարբեր առիթներով, բայց այս ավանդույթը գոյություն չունի, Հայաստանում պաշտոնի նշանակվելը և պաշտոնից ազատելը որևէ մեկնաբանություն, բացատրություն չի ունենում, մինչդեռ հասարակությունը պետք է տեղեկացված լինի պատճառների մասին:
Ի պատասխան հարցին, թե արդյո՞ք հրաժարականից հետո պաշտոնյան չպետք է պատասխանատվության ենթարկվի, Ա. Վարդանյանը նշեց. «Պաշտոնից հրաժարվելը չպետք է լինի մեղքերի քավության ինդուլգենցիա: Եթե կան փաստեր, բնականաբար պիտի համապատասխան գործողություններ իրականացվեն համապատասխան մարմինների կողմից»:
Մանրամասները՝ տեսանյութում:
