Շիրակի մարզի ընդհանուր իրավասության դատարանի Արթիկի նստավայրում Աշոտ Մանուկյանի նախագահությամբ ավարտվել է Արմեն Եգորյանի գործի դատավարությունը:
30-ամյա Արմեն Եգորյանը երրորդ անգամն է դատապարտվել: Ընդ որում՝ երկրորդ պատժի կրումից դեռ չազատված, անմիջապես կալանավայրից գործել է երրորդ հանցանքը ու նույն՝ «Արթիկ» քրեակատարողական հիմնարկում էլ կրում է երրորդ պատժաչափը:
Արագածոտնի մարզի ընդհանուր իրավասության դատարանի 2009 թվականի հոկտեմբերի 9-ի դատավճռով Արմեն Եգորյանը 9 տարի ազատազրկման էր դատապարտվել ավազակային հարձակման համար:
«Արթիկ» քրեակատարողական հիմնարկում գտնվելով՝ Եգորյանը 2012 թվականի օգոստոսի 31-ին համացանցի «Օդնոկլասնիկի» սոցիալական կայքի միջոցով ծանոթացել է Գավառ քաղաքի բնակչուհի Հ.-ի հետ: Նա ներկայացել է «Արմեն Սարգսյան» անուն-ազգանունով, սկսել է աղջկա հետ շփվել հաղորդագրություններով ու հեռախոսազանգերով:
Ամուսնացած, խնամքին մինչև 14 տարեկան մեկ երեխա ունեցող Արմենը խաբել է, թե ամուսնացած չէ, ավազակային հարձակման համար երկարաժամկետ ազատազրկման դատապարտված լինելով՝ խաբել է, թե 1 տարի ազատազրկման է դատապարտվել վրաերթի համար, ու իրեն այդ պատժից մնացել է կրելու ընդամենը 6 ամիսը:
Արմենը աղջկան կարողացել է համոզել, որ հեռվից հեռու սիրահարվել է նրան և շուտով, ազատություն դուրս գալով, պետք է ամուսնանա նրա հետ: Էլ ի՞նչ էր հարկավոր համացանցային նորածանոթ զույգին՝ երջանիկ լինելու համար: Միմիայն՝ երիտասարդի ազատ արձակումը:
Եգորյանը խաբել է աղջկան, թե 2012 թվականի սեպտեմբերի 7-ին պայմանական-վաղաժամկետ ազատվելու է, ու դրա համար իրեն գումար է հարկավոր. ո՞վ չգիտի, որ առանց գումարի պայմանական ազատվել հնարավոր չէ: Նա խոստացել է. եթե աղջիկը գումարով օգնի, ապա ինքն ազատվելուց անմիջապես հետո կվերադարձնի այն, ապա կխնդրի աղջկա ձեռքը:
Ըստ մեղադրանքի՝ խաբեությամբ ու աղջկա վստահությունը չարաշահելով՝ Արմեն Եգորյանը 2012 թվականի սեպտեմբերի 3-ից մինչև սեպտեմբերի 5-ը իր ուղարկած մարդկանց միջոցով աղջկանից վերցրել ու հափշտակել է 1 միլիոն 978 հազար 304 դրամի ընդհանուր արժողությամբ 12 անուն ոսկե զարդեր և 100 դոլար: Այս ամենը նա ծախսել է իր կարիքների համար:
Կալանավայրից ազատված փեսացուին երկու օր ապարդյուն սպասելուց հետո աղջիկը գլխի է ընկել, որ խաբվել է:
2012 թվականի սեպտեմբերի 8-ին ոստիկանության ՔԳՎ Գեղարքունիքի մարզի քննչական բաժնում հարուցվել է քրեական գործ:
Արմեն Եգորյանին մեղադրանք է առաջադրվել խարդախությամբ հափշտակություն կատարելու համար՝ ՀՀ քրեական օրենսգրքի 178 հոդվածի 2-րդ մասի 2-րդ կետով:
Ամբաստանյալի միջնորդությամբ գործը քննվել է արագացված ընթացակարգով:
Դատարանը հաշվի է առել, որ Եգորյանը տուժողին պատճառած նյութական վնասն ամբողջությամբ վերականգնել է, ընդունել է մեղքը ու զղջացել է:
Միաժամանակ, հաշվի է առնվել ամբաստանյալի կողմից հանցանք կատարելու վտանգավոր ռեցիդիվը:
Արմեն Եգորյանը մեղավոր է ճանաչվել ու վերջին հաշվով դատապարտվել 6 տարի ազատազրկման: Պատժի սկիզբը՝ 2012 թվականի օգոստոսի 31-ից:
