Եվրոպայում թմրամիջոց է օգտագործում ավելի քան 15 միլիոն մարդ: Այս մասին հայտարարել է ԵԱՀԿ քարտուղարության՝ անդրազգային սպառնալիքների հարցերով դեպարտամենտի տնօրեն Ալեքսեյ Լիժենկովը՝ փոխանցում է RIA Novosti-ն:
«Միայն մեր տվյալներով՝ Եվրոպայում ավելի քան 15 միլիոն մարդ թմրանյութ է օգտագործում»,- ասել է Լիժենկովը Մոսկվայում անցկացվող Թմրանյութերի ապօրինի շրջանառության դեմ պայքարի իրավապահ մարմինների միջազգային համաժողովի ժամանակ:
Նա հավելել է, որ այդ խնդրի լուծման համար անհրաժեշտ է ուշադրություն դարձնել ԵԱՀԿ երկրների հսկիչ-անցագրային ռեժիմին: «Կարևոր է սահմանային ծառայությունների ներուժի ամրապնդում. ԵԱՀԿ երկրների սահմանները պետք է բարեկամական լինեն օրինապահ քաղաքացիների համար, սակայն կոշտորեն կանխեն թմրանյութերի փոխադրումները»,- ասել է Լիժենկովը:
Ներկայում կազմակերպությունը մշակում է աֆղան որբերի օգնության նախագիծ: Լիժենկովի պարզաբանմամբ՝ նախագծի էությունն այն է, որ արտերկրում աֆղան որբ երեխաների համար ապահովվի կրթությունը: Նրանք այնուհետև պետք է համալրեն թմրանյութերի դեմ պայքարող աֆղան մարտիկների շարքերը:
