ԱՄՆ նախագահի թեկնածու միլիարդատեր Դոնալդ Թրամփը սիրում է խոսել իր հարստության մասին՝ գրում է BBC-ի ռուսական ծառայությունը:
«Ես շատ հարուստ եմ,- ասել է նա իր կողմնակիցներին:-Ես միշտ կարողացել եմ փող ստանալ»:
Թրամփն իր կարողությունը գնահատում է ավելի քան 10 մլրդ դոլար, թեև փորձագետները վիճարկում են այդ գնահատականը: Իրականում պարզ չէ՝ նա որքան փող ունի:
Թրամփի առաջին խոշոր նախագիծը եղել է Commodore հյուրանոցը, որը նա գնել է 1976թ. Hyatt Organization-ի հետ գործընկերությամբ: Այդ գործարքի գինը չի նշվում: Այդ ժամանակ Մանհեթենում շատ շենքեր փակվելու վտանգի առաջ են եղել: Commodore-ը մեկուկես մլն դոլար պարտք է վերցրել, իսկ Նյու Յորքն այդ տարիներին այնքան գրավիչ տեղ չի համարվել ունևոր զբոսաշրջիկների համար, ինչպես հիմա:
Բանակցողի իր տաղանդն օգտագործելով՝ Թրամփը Նյու Յորքի իշխանություններից հասել է 40 տարով հարկային զեղչերի հյուրանոցի համար: Դա նրան հնարավորություն է տվել 160 մլն դոլար տնտեսել: 1996թ. նա հյուրանոցի իր մասը վաճառել է 142 մլն դոլարով:
Թրամփը շարունակել է ներդնել նյույորքյան անշարժ գույքի մեջ, ձեռք է բերել նաև Plaza հյուրանոցը և Bank of Manhattan-ի նախկին շենքը:
Թրամփի անշաժ գույքի ամենաարժեքավոր օբյեկտը մնում է 58-հարկանի Trump Tower շենքը: Այնտեղ է գտնվում նրա Trump Organization ընկերության շտաբ-բնակարանը: Նա ընտանիքի հետ ապրում է այդ երկնաքերի վերին հարկերում:
1980-ական թթ. Trump Organization-ը սկսել է Թրամփի անվան օգտագործման արտոնագրեր վաճառել:
Այժմ շատ ընկերություններ Թրամփին վճարում են նրա անվան օգտագործման արտոնագրի համար, այդ ընկերություններից են Trump Ocean Club-ը և Trump Fine Foods-ը:
Թրամփն ավելի հայտնի է դարձել 1987թ., երբ հրատարակել է «Գործարքի արվեստը» գիրքը:
Դոնալդ Թրամփը յուրաքանչյուր կոպեկը խնայող մարդու համբավ ունի: «Ես մինչև վերջ պայքարում եմ հնարավորինս քիչ վճարելու համար»,- ասում է նա:
Trump Organization-ի հաջողության պատճառներից մեկն այն է, որ Թրամփը պատրաստ է եղել իր անունը տալ ցանկացած նախագծի, մթերքի, ապրանքի՝ շենքերից մինչև սթեյքներ և փողկապներ:
