Ռուսական RIA Novosti լրատվական գործակալության փոխանցմամբ՝ Fitch միջազգային վարկանշային գործակալությունը հայտարարել է, որ նավթի գնանկումն ու դրան հաջորդած Ադրբեջանի ազգային արժույթի արժեզրկումը մեծապես ազդել է ադրբեջանական բանկերի կապիտալի որակի վրա:
Fitch-ը ադրբեջանական բանկերի կապիտալացումն ընդհանուր առմամբ գնահատում է որպես թույլ: Գործակալության վերլուծած բանկերի մեծ մասի կապիտալի բավարար լինելու գործակիցը դեկտեմբերին՝ արժույթի 50 տոկոսանոց արժեզրկումից հետո, նվազել է 3-5 կետով:
Խնդրահարույց վարկերի սեկտորը 2015 թվականին աճել է մինչև 9.5 տոկոսի՝ 2014 թվականի 8.3 տոկոսի դիմաց: Գործակալությունն ընդգծում է, որ գոյություն ունեն ակտիվների որակի նվազեցման հավելյալ ռիսկեր՝ կապված տնտեսական անկման և արտարժույթում վարկերի մեծ բաժնեմասի հետ (2015 թվականի ավարտին 51 տոկոս):
