Ռուսական RIA Novosti լրատվական գործակալության փոխանցմամբ՝ ռուսական «Գազպրոմ» և թուրքական մասնավոր գազային ընկերությունները լուծել են գազի մատակարարման գնի վերաբերյալ ծագած բոլոր հարցերը: Այս մասին լրատվամիջոցին հայտնել է իրավիճակին ծանոթ աղբյուրը:
Աղբյուրի տվյալներով՝ բանակցող կողմերի միջև պայմանավորվածությունը ձեռք է բերվել բառացիորեն օրեր առաջ, իսկ պաշտոնապես այդ մասին կհայտարարվի ամենամոտ ժամանակներս:
Լրատվամիջոցի զրուցակիցը այլ մանրամասներ չի հայտնել:
Թուրքիայում, Botas պետական խողովակաշարային ընկերությունից բացի, ռուսական «Գազպրոմի» հետ համագործակցում են նաև մի շարք մասնավոր ընկերություններ՝ Enerco Enerji, Avrasya gaz ու Akfel gas (բոլոր երեքն էլ մտնում են Akfel Holding-ի մեջ), Bosphorus gas, Shell Turkey, Bati Hatti և Kibar Enerji:
2015 թվականի ապրիլի վերջին «Գազպրոմը» այդ ընկերությունների հետ արդեն իսկ պայմանավորվել է 10.25 տոկոսանոց գազային զեղչ տրամադրելու մասին:
