Հռոմի պապ Ֆրանցիսկոսը կաթոլիկ եկեղեցուն կոչ է արել մոտենալ ժամանակակից իրողություններին: Ապրիլի 8-ին հրապարակվել է Պապի գրավոր ուղերձը Amoris laetitia (Սիրո ուրախություն)՝ նվիրված ընտանիքի և ամուսնության հարցերին: Այս մասին հայտնում է korrespondent.net-ը:
Դրանում հռոմեա-կաթոլիկական եկեղեցու ղեկավարը թեև հենվում է ընտանեկան արժեքների հիմնական նորմերի վրա, սակայն միաժամանակ հանդես է գալիս «սառը, ծեծված բարոյականության» դեմ: Նա հավատացյալներին զգուշացնում է «միայն բարոյական օրենքների վրա հենվելուց, որոնք ինչպես քարի բեկորներ՝ նետված են մարդկային կյանքերի վրա»:
Նրա կարծիքով՝ եկեղեցին պետք է ավելի շատ գթասրտություն ցուցաբերի և օգնի բարդ ընտանեկան իրավիճակներում հայտնված մարդկանց: «Ոչ ոք չի կարող հավերժ պատժված լինել»,- ասել է Ֆրանցիսկոսը՝ խոսելով այն հավատացյալների մասին, որոնց կյանքը չի համապատասխանում կաթոլիկ եկեղեցու նորմերին:
Իր ուղերձում նա մանրամասնորեն անդրադարձել է նաև այնպիսի թեմաների, ինչպիսիք են կիրքը, քնքշությունը և էրոտիկան: Նա պնդում է, որ ամուսնության մաս կազմող էրոտիկ բաղադրիչը հարկավոր է «դիտարկել որպես Աստծո պարգև»:
