Ռուսական RIA Novosti լրատվական գործակալության փոխանցմամբ՝ Ռուսիո պատրիարք Կիրիլն այսօր ուղերձներ է հղել ամենայն հայոց կաթողիկոս Գարեգին 2-րդին և Կովկասի մուսուլմանների վարչության նախագահ, շեյխ ուլ իսլամ Ալլահշուքյուր Փաշազադեին։
Դրանցում Կիրիլն իր մտահոգությունն է հայտնել Լեռնային Ղարաբաղում կոնֆլիկտի զարգացման կապակցությամբ։ Նա հույս է հայտնել, որ Աստծո օգնությամբ կհաստատվի շուտափույթ հրադադար և կողմերի հաշտեցում։
Նրա խոսքով՝ Հայաստանի, Ռուսաստանի և Ադրբեջանի հոգևոր առաջնորդներն արդեն բազում տարիներ համատեղ ծառայում են Ղարաբաղյան հակամարտության հաղթահարման գործին:
«Վստահ եմ, որ այդ արժեքավոր փորձն այսօր կոչված է հիմք դառնալ ամուր և արդար խաղաղություն արարելու համար»,- ասել է նա։
Նա Գարեգին 2-րդին և Ալլահշուքյուր Փաշազադեին կոչ է արել օգտագործել իրենց ողջ հեղինակությունը՝ որպես հոգևոր առաջնորդներ, արյունահեղության ու թշնամանքի դադարեցման համար․ «Իմ կողմից պատրաստ եմ համակողմանի աջակցություն ցուցաբերել հակամարտության կարգավորման գործին»։
