Մադրիդի «Ռեալ»-ի նախկին կիսապաշտպան Գուտին խոսել է «Բարսելոնա» – «Ռեալ Մադրիդ»(1:2) դիմակայության մասին: Ըստ Գուտիի՝ «Ռեալ»-ից կրած պարտությունը վատ իրավիճակ է ստեղծել կատալոնական ակումբի գլխավոր մարզիչ Լուիս Էնրիկեի համար:
«Լուիս Էնրիկեն նյարդայնանում է, քանի որ պարտվել է «Ռեալ»-ին, իսկ եթե պարտվի նաև «Ատլետիկո»-ին… Շատ բարդ իրավիճակ կստեղծվի նրա համար: «Բարսելոնա»-ն իրեն անհաղթահարելի էր համարում, սակայն անհաղթահարելի ոչինչ չկա:
«Արքայական» ակումբի առաջատար եռյակը՝ Ռոնալդուն, Բեյլն ու Բենզեման, շատ ավելի լավ տեսք ուներ, քան Մեսսին, Նեյմարն ու Սուարեսը:
Բոլորը խոսում են այն մասին, որ «կապտանռնագույններ»-ը մեծ թիմ ունեն, սակայն «Ռեալ»-ն էլ չի զիջում:
Զիդանի ընտրած մեկնարկային կազմը փայլուն էր տակտիկական նման խաղի համար: Հստակ երևաց, որ նա շատ էր պատրաստվել «Էլ կլասիկո»-ին: Ուրախ եմ Կազեմիրոյի ու Կարվախալի համար:
Ինչ վերաբերում է Ռամոսին, նրան խորհուրդ կտամ վերահսկել նյարդերը: Խաղավերջում նրա արածը թիմի համար կարող էր անդառնալի լինել»,- Գուտիի խոսքն է փոխանցում AS-ը:
