2011թ. Մոսկվայի միլիցիան կկրճատվի մոտ 10 հազար աշխատակցով: Այս մասին հայտնում է РИА Новости-ին:
Ինչպես տեղեկացրել է քաղաքի ներքին գործերի գլխավոր վարչության պետ Վլադիմիր Կոլոկոլցևը, իրենք ընթացիկ տարում արդեն իսկ կրճատել են 12 հազար մարդ: «Հաջորդ տարի նախատեսված է կրճատել ևս 10 հազար: Եթե պետության բյուջետային հնարավորությունները թույլ են տալիս պահել որոշակի թվով աշխատակիցների, ապա հարկավոր է պահել հենց այդ թիվը»,-նշել է Կոլոկոլցևը:
Ներկայումս մոսկովյան միլիցիայի թվաքանակը 100 հազար մարդ է: Մասնագիտական տոնի առիթով այսօր շնորհավորական ուղերձ է հղել Ռուսաստանի նախագահ Դմիտրի Մեդվեդևը: Նա հույս է հայտնել, որ ներքին գործերի մարմինները ժամանակակից կերպարանք կընդունեն, իսկ իրավապահների գործունեությունը կդառնա ավելի բաց և արդյունավետ:
ՌԴ ՆԳՆ բարեփոխումները սկսվել էին մոտ մեկ տարի առաջ: Դրա շրջանակներում նախատեսվում է 20%-ով կրճատել համակարգի աշխատակիցներին և միլիցիան վերանվանել ոստիկանություն (полиция):
