«Միայն բախտավոր աստղի տակ ծնվելով հաջողակ բիզնեսմեն չես դառնա»: Իր բախտից գոհ, բիզնեսից դժգոհ 30-ամյա դաշտավանցի Սանասար Խաչատրյանն է: Ունի 5 զավակ և Հայաստանում բիզնես սկսելու ավելի քան 8 տապալած փորձ: Վճռել է, որ ամեն գնով բիզնես նախագծերից մեկը հաջողելու է. կարևոր շարժիչն ու մոտիվացնողը 5 զավակներն են:
Այժմ ամեն ինչ սկզբից։ Երեք տարի առաջ Սանասար Խաչատրյանը բարձրագույն կրթությունը արտասահմանում ստանալուց հետո որոշեց վերադառնալ Հայաստան։ Հորից ժառանգած այս հողակտորում տասնյակ տարիների գոյացրած ճահիճը որոշեց մաքրել, ձկնաբուծարան հիմնել:
Ջրօգտագործման անհրաժեշտ թույլտվությունն ստանալու խոստմամբ՝ ճահիճը մաքրել է, ձկնաբուծարանի կառուցապատումն իրականացրել, մանրաձուկ ձեռք բերել, մեծ ներդրումներ կատարել, բայց խոստացված փաստաթղթերն այդպես էլ չի ստացել:
Անհաջողության ալիքին չհարմարվելով՝ իրավիճակից դուրս գալու փորձ է արել: Նախկին ձկնաբուծարանի հարևանությամբ հիմնել է մեքենայի լվացման կետ, ավտոպահեստամասերի խանութ և բենզալցակայան: Անցել է ժամանակ՝ Դատական ակտերի հարկադիր կատարման ծառայությունը, մեր հերոսի պնդմամբ, աչքը դրել է այս ամենի վրա: Վարկերի պատճառով բիզնեսն աճուրդի է հանվել:
Դռները կողպված են: Ավտոսպասարկման կետերից և ոչ մեկը չի գործում: Միայն պահեստամասերի խանութն են մեկ-մեկ բացում, այն էլ եթե գյուղացիներից մեկին ինչ-որ բան է պետք լինում:
Թե ինչու դեպքերն այսպես զարգացան և ամեն ինչ հասավ այս օրին, Սանասար Խաչատրյանի համոզմամբ՝ սկսեց այն ժամանակ, երբ Երևանում ամեն օր սկսեց գործել ավտոպահեստամասերի շուկան։ Առևտուրը կանգնեց, սնանկացումը դարձավ օրերի հարց:
Գործին նոր թափ հաղորդելու համար նոր ներդրում անելու իմաստ գործարարը չի տեսնում:
Ավտոլվացման կետն էլ անորոշ ժամանակով չի գործի: Սարքավորումները ժանգոտում են, կառույցը վերածվում է սարդերի բնակավայրի:
Երիտասարդ գործարարի ձախողած հաջորդ գործը լավաշի արտադրությունն է։ Արտադրամասը հիմնելիս մտածել է՝ քանի ձեռքերում ուժ կա, և ունի աշխատելու կորով, այս մի գործն էլ ձեռնարկի։ Ավաղ, այս փորձն էլ է ձախողել: Միջոցները քիչ էին, գործը գլուխ չեկավ:
Չգործող գարեջրատան տարածքում Սանասարը բացատրեց խնդրի բուն էությունը: Ասում է՝ բիզնես-վարկ տրամադրելու ժամանակ բանկը ծրագրով անհրաժեշտ գումարից ավելի քիչ է փող տալիս: Այդտեղից էլ սկսվում է թելը խճճվել:
Սանասարը սեփական մաշկի վրա է զգացել՝ ինչ ասել է սալի և մուրճի արանքում մնալ: Ապակե ջերմատուն ունի, բայց պոլիէթիլենային ջերմատան մեթոդով է փորձում բերք արտադրել: Աբսուրդն այստեղ գագաթնակետին է հասնում:
Ջերմատունը գազով ջեռուցելու հնարավորություն չունի, բայց համոզված է՝ խնդրին անհատական մոտեցմամբ լուծում տալը կարող է իրավիճակից ելք լինել:
Ծանր կացությունից դուրս գալու համար աջակցության կարիք ունի: Ուզում է թիկունքին պետության կամ կառավարության ուժը զգալ:
Անկախ բարդության աստիճանից: Դժվարությունից ելքը գտնելու է և շարունակելու է անկոտրում մնալ:
