Ամերիկացի միլիարդատեր Դոնալդ Թրամփի նախագահությունը համարվում է համաշխարհային թոփ 10 ռիսկերից մեկը՝ ըստ EIU (Economist Intelligence Unit) հետազոտական ընկերության։
EIU-ն նախազգուշացնում է, որ նա կարող է խաթարել համաշխարհային տնտեսությունը և բարձրացնել քաղաքական ու անվտանգության ռիսկերն ԱՄՆ-ում։
Նա ավելի ռիսկային է դասվել, քան Բրիտանիան՝ ԵՄ-ն լքելու դեպքում, կամ զինված ընդհարումը Հարավչինական ծովում՝ փոխանցում է BBC-ն։
Ընկերությունը Թրամփի նախագահությանը տվել է 25 հնարավոր բալերից 12 միավոր։ Անդրադարձ է արվում Մեքսիկայի հետ սահմանին պատ կառուցելու, մուսուլմանների մուտքն արգելելու վերաբերյալ հանրապետական թեկնածուի հայտարարություններին։
Թրամփն իրեն տրված 12 բալով նույն մակարդակի վրա է, ինչ «գլոբալ տնտեսությունն ապակայունացնող ջիհադիստական ահաբեկչության սպառնալիքի աճի ռիսկը»։ Նա թշնամաբար է տրամադրված ազատ առևտրի դեմ և Չինաստանին պիտակավորում է որպես «արժութային մանիպուլյատոր»։
«Նրա ռազմատենչ միտումները Մերձավոր Արևելքի նկատմամբ և բոլոր մուսուլմանների՝ ԱՄՆ ուղևորության արգելքը կլինեն հավաքագրման հզոր գործիք ջիհադիստական խմբերի համար՝ բարձրացնելով նրանց սպառնալիքն ինչպես տարածաշրջանի ներսում, այնպես էլ դրա սահմաններից դուրս»,- ասվում է EIU-ի հաղորդագրությունում։
Նշվում է, որ Թրամփի հանդեպ Հանրապետական հիերարխիայի ներսում թշնամանքը՝ Դեմոկրատական ընդդիմության հետ զուգորդությամբ, կտանի Կոնգրեսում նրա արմատական քաղաքական նախաձեռնությունների արգելափակման։
