«Անճոռնի, ապօրինի շինություններ են, ի՞նչ եք ուզում, որ ես ասեմ»,- այսօր պատասխանելով «Առաջին լրատվական»-ի հարցին, թե ինչպե՞ս է գնահատում բազմաբնակարան շենքերի տանիքներին կառուցվող նոր շինությունները, ասաց քաղաքաշինության նախարար Նարեկ Սարգսյանը։ Մեր դիտարկմանը, որ եթե դրանք անճոռնի ու ապօրինի են, ապա ինչպե՞ս է պատահել, որ բնակիչները բոլորը սեփականության վկայական ունեն, նախարարը կարճ պատասխանեց. «Ես չգիտեմ»։
Ինչ վերաբերում է, քաղաքի կենտրոնում հուշարձանների և պատմական շենքերի ապամոնտաժմանը, ապա նախարարը ևս մեկ անգամ նշեց, որ «Հին Երևան» ծրագրով կլուծվի այդ խնդիրը։ Իսկ Իսահակյանի գրադարանի նախկին շենքի մասին, որը վերջերս քանդվեց, նախարարն ասաց, որ այդ՝ նախախորհրդային ժամանակաշրջանի շենքերը հին են, 100-150 տարվա պատմություն ունեն, ուստի առավելապես կարևորվում է քաղաքաշինական միջավայրի հատվածը, այսինքն` արտաքին հատվածը: «Չեմ կարծում, որ բոլոր դեպքերում հնարավոր է դրանք վերականգնել: Առավել կարևոր են շենքերի դիրքը և ճակատները քաղաքի մեջ»,- ասաց Նարեկ Սարգսյանը:
Նախարարի խոսքով՝ իրենք արդեն ներկայացրել են ԱԺ-ին «Երևանի կոնտրոնի մասին» օրենքը։ Ըստ Նարեկ Սարգսյանի՝ այդ օրենքում կենտրոնի մասով պատժամիջոցներ կան սահմանված, և հանրային պահանջով ծնված այդ օրենքը կլուծի բոլոր մտահոգիչ խնդիրները։
Մանրամասները՝ տեսանյութում
