Մեծ Բրիտանիայի վարչապետ Դեյվիդ Քեմերոնը երեկ հայտարարել է, որ պաղեստինյան երկու խմբավորումների` «Ֆաթհ»-ի և «ՀԱՄԱՍ»-ի միջև համաձայնության ձեռք բերումը կարող է օգնել պաղեստինա-իսրայելյան հակամարտության կարգավորմանը, եթե «ՀԱՄԱՍ»-ը հրաժարվի բռնություններից: Այս մասին նա ասել է իսրայելցի իր գործընկեր Բենյամին Նեթանյահուի հետ հանդիպումից հետո: Այս մասին հաղորդում է Associated Press գործակալությունը:
Նեթանյահուն, սակայն, իր հայտարարություններում ավելի հոռետես էր: Նա ասել է, որ Մերձավոր Արևելքի ճակատագիրը և խաղաղության գործընթացը «կախված է մազից». «Ժողովրդավարական ու զսպվածության ուժերի և ահաբեկչական ու բռնատիրական ուժերի միջև մեծ ճակատամարտ է գնում»,- ասել է Նեթանյահուն:
Հիշեցնենք, որ անցյալ շաբաթ պաղեստինյան երկու խմբավորումների միջև ձեռք է բերվել սկզբունքնային համաձայնություն, իսկ երեկ Կահիրեում ստորագրվել է համաձայնագիր, որով «Ֆաթհ»-ն ու «ՀԱՄԱՍ»-ը որոշել են վերջ դնել հակամարտությանը, ձևավորել «արհեստավարժների կառավարություն», ինչպես նաև առաջիկա մեկ տարվա ընթացքում անցկացնել խորհրդարանական և նախագահական ընտրություններ:
