Ֆրանսիացի երկու դպրոցականներ, որոնք Facebook սոցցանցում սպառնացել են Փարիզում համերգասրահ պայթեցնել, դատարանի առաջ կկանգնեն ահաբեկչական գործունեությանը մասնակցության համար: Այս մասին հայտնում է Agence France-Presse-ը:
Խոսքը 15 և 17 տարեկան դեռահասների մասին է: Նրանք ձերբակալվել են այս շաբաթ այն բանից հետո, երբ հատուկ ծառայությունները բացահայտել են նրանց հաղորդագրությունները Facebook-ի փակ զրուցարանում, որոնցում դպրոցականներն ուղիղ հայտարարել են ահաբեկչություն իրագործելու մտադրության մասին:
Միևնույն ժամանակ, հետաքննիչները նշել են, որ «դպրոցականները ոչ մի կոնկրետ ծրագիր չեն ունեցել». ո´չ զենք, ո´չ պայթուցիկներ նրանց տան խուզարկությունների ընթացքում չի հայտնաբերվել:
Չնայած դրան՝ ահաբեկչական գործունեությանը մասնակցության պաշտոնական մեղադրանք է առաջադրվել, քանի որ հարցաքննության ժամանակ աղջիկները հաստատել են իրենց մտադրությունները:
