Ադրբեջանական Turan լրատվական գործակալության փոխանցմամբ՝ Եվրոպայի խորհրդի Նախարարների կոմիտեն մարտի 8-10-ին դիտարկել է ՄԻԵԴ-ի որոշումների իրագործման հետ կապված հարցեր։ Քննարկումների արդյունքով որոշում է կայացվել ադրբեջանական «Հանրապետական այլընտրանք» (ReAl) շարժման առաջնորդ Իլգար Մամեդովի գործով։
Նախարարների կոմիտեն, հիշեցնելով իր նախկին 5 որոշումների ու միջանկյալ բանաձևերի մասին, մտահոգություն է հայտնել, որ Մամեդովը դեռ ազատ չի արձակվել՝ չնայած նրան, որ ՄԻԵԴ-ը վճռել է, որ խախտվել են նրա հիմնարար ազատությունները։
Հաշվետու ժամանակահատվածում Ադրբեջանի կառավարությունից չի ստացվել որևէ պատասխան՝ կապված Մամեդովի ֆիզիկական անձեռնմխելիության ապահովման պահանջի հետ։
Նախարարների կոմիտեն Եվրոպական կոնվենցիայի 46-րդ հոդվածին համապատասխան ևս մեկ անգամ Ադրբեջանի կառավարությանը հիշեցրել է Ստրասբուրգի դատարանի որոշումները կատարելու վերաբերյալ նրա ստանձնած պարտավորությունների մասին և կոչ է արել ազատ արձակել Մամեդովին։
Իլգար Մամեդովը կալանավորվել է 2013 թվականի հունվարին՝ կապված Իսմայիլիի շրջանի անկարգությունների հետ և դատապարտվել է 7 տարվա ազատազրկման։ 2014 թվականին ՄԻԵԴ-ը անհիմն է համարել Իլգար Մամեդովին կալանավորելն ու ազատազրկման դատապարտելը և Ադրբեջանին կոչ է արել ազատ արձակել նրան։
