Թուրքական T24 առցանց թերթի փոխանցմամբ՝ Zaman օրաթերթի տպաքանակը հոգաբարձուների նշանակումից հետո խստապես նվազել է։ Եթե մինչև հոգաբարձուների նշանակումը Zaman-ի տպաքանակը կազմում էր 635.000 օրինակ, ապա նրանց ղեկավարությամբ թերթի տպաքանակն առաջին իսկ օրը նվազեցվել է 10.000-ից էլ պակաս։
Zaman-ի տպաքանակը շարունակել է նվազել հաջորդ օրերին։ Հոգաբարձուների ղեկավարության ներքո թերթն առաջին անգամ հրատարակվել է կիրակի, այդ օրը նրա տպաքանակը կազմել է 8450 օրինակ։ Երկուշաբթի թերթի տպաքանակը կազմել է 6031 օրինակ, երեքշաբթի՝ 3809 օրինակ, չորեքշաբթի՝ 3445 օրինակ։
Ընդգծվում է, որ Թուրքիայում իշխող «Արդարություն ու զարգացում» կուսակցության ու Ֆեթհուլլահ Գյուլենի շարժման փոխհարաբերությունների վատթարացումից առաջ Zaman-ի տպաքանակը հասնում էր 1.2 միլիոն օրինակի։ Zaman-ը Թուրքիայում ամենամեծ տպաքանակն ունեցող թերթն էր, մինչև նոր հոգաբարձուների նշանակումը։
