Նոր Սահմանադրությամբ, բացի Երևանից, նաև Գյումրիի ու Վանաձորի ավագանու ընտրություններում այլևս անհատներ չեն կարողանալու մասնակցել: Այսուհետ, ինչպես Երևանում, այնպես էլ այդ քաղաքներում ընտրությունները լինելու են համամասնական ընտրակարգով, իսկ քաղաքապետները կընտրվեն արդեն ավագանու կողմից: Այսինքն՝ բոլոր անհատները պետք է կամ անդամագրվեն որևէ կուսակցության, կամ մտնեն որևէ կուսակցության համամասնական ցուցակ:
Հայտնի է, որ աշնանը կայանալիք Գյումրիի քաղաքապետի ընտրություններում հավակնորդ թեկնածուներից է անկուսակցական, ԲՀԿ խմբակցության պատգամավոր Մարտուն Գրիգորյանը:
Վերջինս փետրվարին Գագիկ Ծառուկյանի հետքերով լքեց ԲՀԿ-ն: Քանի որ Գրիգորյանն այժմ անկախ պատգամավոր է և հավակնում է Գյումրիի քաղաքապետ դառնալ, նրանից հարցրինք, թե հնարավո՞ր է հարի Դաշնակցությանը, որպեսզի ավելի հեշտ դառնա Գյումրիի քաղաքապետ:
Ինչպես հայտնի է, այսօր կառավարությունը կոալիցիոն հուշագրի շրջանակներում Շիրակի մարզպետի պաշտոնում նշանակեց դաշնակցական Հովսեփ Սիմոնյանին: «Ես էս պահի դրությամբ անկուսակցական եմ, իմ պատգամավորական գործունեությամբ եմ զբաղվում,- ասաց Մարտուն Գրիգորյանը՝ շարունակելով,- քանի որ անկուսակցական ճանապարհով առաջադրվելու խնդիրն արդեն փակված է, մենք թիմով կորոշենք, թե որ կուսակցությունով ենք մասնակցելու: Էս պահի դրությամբ հստակ որոշում չունենք»:
Մամուլում այսօր գրվել է, որ ՀՀԿ-ն որոշում է կայացրել ո՛չ Սամվել Բալասանյանին և ո՛չ էլ Մարտուն Գրիգորյանին չընդգրկել իր ցուցակում, այլ ընտրությունների գնալ սեփական ցուցակով և այլ քաղաքապետացուով, որը գյումրեցի է լինելու։
Թե որ կուսակցության հետ է իրեն պատկերացնում Մարտուն Գրիգորյանը, չի ասում: «Որոշումը կքննարկեմ թիմի հետ, երբ որ որոշումներ ունեցանք, կասենք: Եթե հնարավոր լիներ առանց կուսակցության մասնակցել, միանշանակ որպես անկուսակցական կմասնակցեի: Նոր Սահմանադրությամբ կուսակցական կարող ես չդառնալ, բայց օրենքը պահանջում է կուսակցության թեմայով առաջադրվել:
Անկուսակցական մարդը չի կարող առաջադրվել: Եթե որոշում կայացրինք, կասենք՝ ինչպես ու որ կուսակցությունով ենք մասնակցելու»:
Գյումրիի նորանշանակ մարզպետ Հովսեփ Սիմոնյանը այսօր կառավարության նիստից հետո մեզ հետ զրույցում հայտարարեց, որ ինքը նախորդներից ավելի լավ է աշխատելու, ու որ Շիրակի ժողովուրդը շնորհակալություն է հայտնելու Դաշնակցությանը իր աշխատանքի համար. «Մի գիշերում մարզը ոսկե մարզ չի կարելի դարձնել, բայց մարդկանց վստահությունը դեպի իշխանությունը, դեպի պաշտոնյան կարելի է վերականգնել, և մարզի ժողովուրդը շնորհակալություն կհայտնի»:
Գյումրիի պատգամավոր Մարտուն Գրիգորյանից հետաքրքրվեցինք, թե հավատո՞ւմ է նորանշանակ մարզպետի հավաստիացումներին: «Դեռ քանի մարդը չի աշխատել: Դեռ չեն էլ բերել, ներկայացրել: Չեմ կարող գնահատականներ տալ՝ լավի կամ վատի,- ասաց Գրիգորյանը՝ հավելելով,- ես չգիտեմ՝ ինքն ինչ է ասել: Ուրեմն ինքն իր ուժերի վրա վստահ է, որ կարող է աշխատի: Մենք ուրախ կլինենք, եթե իրա մոտ ստացվի խնդիրների լուծումներ գտնել: Որպես պատգամավոր՝ ուրախ կլինի ի շահ մարզի անել ամեն ինչ: Եթե մեկը կարող է մի բան անել մարզի համար, փառք ու պատիվ իրան»:
