Հյուսիսային Կորեայի հեռուստատեսությունն իր պատմության մեջ առաջին անգամ ցուցադրել է Հարավային Կորեայի դրոշը: Այս մասին հաղորդում է ITAR-TASS-ը՝ հղում կատարելով ճապոնական ԶԼՄ-ներին:
Դրոշը ցուցադրվել է Փարիզում անցկացվող սեղանի թենիսի առաջնության շրջանակում կատարված տեսագրությունում: Հարավային Կորեայի դրոշը հստակ երևում է խաղերից մեկի հաշվետախտակի մոտ. առաջնությունում հաղթել էին Հյուսիսային Կորեայի մարզիկները:
Նախկինում հյուսիսկորեական հեռուստատեսությունը «լղոզում էր» Հարավային Կորեայի դրոշը, երբ այն հնարավոր չէր կտրել կադրից:
Սեուլում ենթադրում են, որ հարավկորեական դրոշի ցուցադրման արգելքի չեղյալ հայտարարումը կարող է վկայել Հյուսիսային Կորեայի կողմից երկխոսության պատրաստակամության մասին:
