Միգրացիոն ճգնաժամի պատճառով Շենգենյան գոտու ներսում սահմանների հնարավոր փակումը կարող է եվրոպական տնտեսությանն արժենալ միլիարդավոր եվրոներ։ Այս մասին հայտնում է գերմանական Süddeutsche Zeitung պարբերականը՝ հղում անելով Եվրահանձնաժողովի կողմից պատրաստված փաստաթղթի նախագծին։
«Սահմանային վերահսկողությունը ոչ միայն կզրկի քաղաքացիներին ազատ տեղաշարժման հնարավորությունից, այլև վնաս կհասցնի ներքին շուկային։ Եվրահանձնաժողովը կարծում է, որ եվրոպական տնտեսությանը դա կարող է արժենալ ընդհանուր առմամբ տարեկան 7-18 մլրդ եվրո»,- գրել է պարբերականը, որի տրամադրության տակ է հայտնվել փաստաթղթի նախագիծը։
Թերթը գրում է, որ ամեն օր մոտ 1.7 մլն ԵՄ քաղաքացիներ հատում են պետական սահմանները՝ աշխատանքի հասնելու համար։ Եթե վերահսկողություն սահմանվի, ապա դա եվրոպական բիզնեսին կարժենա մոտ 2.5-4.5 մլրդ եվրո։
Կտուժեն նաև տրանսպորտային, լոգիստիկ և զբոսաշրջային ոլորտները։
Եվրահանձնաժողովը նախապատրաստել է Շենգենի ներսում տեղաշարժի ազատ գոտու պահպանման ծրագիր։
