Հայաստանում քաղբանտարկյալներ չկան: Նման տեսակետ է հայտնել Հայաստանում Եվրամիության պատվիրակության ղեկավար, դեսպան Պյոտր Սվիտալսկին նախօրեին «Հայկական ժամանակ»-ին տված հարցազրույցում:
«Նոր Հայաստան» հանրային փրկության ճակատի անդամ Վարուժան Ավետիսյանը նկատում է՝ Եվրոպան այլ վարքագիծ կդրսևորեր, եթե բացի այսօրվա իշխանության միջոցով Հայաստանի հետ համագործակցությունից այլընտրանքային տարբերակ լիներ: Միևնույն ժամանակ Ավետիսյանն ընդգծեց՝ Սվիտալսկին հերքում է Հայաստանում քաղբանտարկյալների առկայության փաստը՝ վկայակոչելով Մարդու իրավունքների Եվրոպական դատարանի ու Եվրոպայի խորհրդի խորհրդարանական վեհաժողովի կողմից ընդունված չափորոշիչները:
ԱԺ «Ժառանգություն» կուսակցության պատգամավոր Թևան Պողոսյանը Սվիտալսկու նման պաշտոնական տեսակետը տրամաբանական է համարել և նկատել, որ այլ պատասխան ակնկալել չի կարելի: Թևան Պողոսյանը նկատում է՝ այս տեսակի մոտեցումը կապված չէ նրա հետ, թե բանտարկվածները հարում են եվրոպամետ կամ եվրոպական կառույցների հետ սերտ համագործակցության մեջ գտնվող ուժի հետ:
