Ինդիանա նահանգից ամերիկացի հանրապետական նախկին կոնգրեսական Դեբ Բարթոնը (Ներկայացուցիչների պալատ) լքել է ադրբեջանական լոբբիստական խումբը, որը նպատակ էր հետապնդում հասնելու նախկին խորհրդային հանրապետության ավտորիտար կառավարության համար ամերիկյան աջակցության։ Նա դադարեցրել է բազմամիլիոնանոց ադրբեջանական լոբբիստական ջանքերում իր դերակատարումը մեկ տարի չվարձատրվելու պատճառով։ Այս մասին հայտնում է «Ազատություն» ռադիոկայանի եվրոպական ծառայությունը։
«Ադրբեջանա-ամերիկյան դաշինք» խումբը հիմնվել է օլիգարխ Անար Մամեդովի կողմից, ով նավթով հարուստ կովկասյան երկրի տրանսպորտի հարցերով նախարարի որդին է և 2011 թվականից ի վեր, ըստ Opensecrets.org-ի, ամերիկացի լոբբիստներին վճարել է ավելի քան 12 մլն դոլար։
«Քանի որ ես տեղեկություն չունեմ Ձեզանից կամ Անարից և չեմ վճարվել մեկ տարի, խնդրում եմ ընդունեք այս էլեկտրոնային նամակը որպես հրաժարականի նամակ»,- գրել է Բարթոնը մարտի 1-ին Ջեյմս Ֆաբիանիին, որի՝ Վաշինգտոնում տեղակայված ընկերությունը զբաղվում է ԱՄՆ-ում խմբի լոբբիզմով։ Հենց նա էլ ժամանակին Բարթոնին ներկայացրել էր Անարին։
Էլեկտրոնաին նամակը հայտնվել է «Ազատության» տրամադրության տակ։
Մամեդովը, ով ԱՄՆ նախագահական ընտրարշավում Հանրապետական կուսակցությունից առաջատար Դոնալդ Թրամփի բիզնես-գործընկերն է Բաքվում 33 հարկանի լյուքս հյուրանոցի կառուցման գործում, չի պատասխանել ֆեյսբուքյան հաղորդագրությանը, պատասխան չի ստացվել նաև նրա կայքում զետեղված որևէ հեռախոսահամարով։
Բարթոնի հրաժարականը հաջորդել է Ադրբեջանա-ամերիկյան դաշինքի ճակատագրի շուրջ ամիսներ շարունակված շահարկումներին։ Բաքվի հակառակորդները մեղադրում էին Ալիևի կառավարությանը՝ օտարերկրացի պաշտոնյաներին նվերներ ընծայելով՝ մարդու իրավունքների խախտումները քողարկելու փորձերի համար:
Ալիևը վերջերս տրանսպորտի նախարարությունից հեռացրեց լայն լիազորությունները, ինչը նշանակում էր ընտանիքի ազդեցության փոքրացում կառավարությունում։
Օգոստոսից ի վեր ադրբեջանական ԶԼՄ-ները՝ հղում անելով անանուն աղբյուրներին, հայտնում էին, որ Մամեդովը ծրագրել է փակել դաշինքը ֆինանսական դժվարությունների պատճառով, որոնց հիմքում Ադրբեջանի տնտեսական ճգնաժամն է։
Բարթոնը դաշինքի ղեկավար էր դարձել 2013 թվականի փետրվարին՝ 30 տարվա կոնգրեսական կարիերան դադարեցնելուց մեկ ամիս անց։
Նա հրաժարվել է ասել, թե որքան է վճարվել որպես կազմակերպության նախագահ, սակայն նշել է, որ չի վարձատրվել 2015 թվականի փետրվարից։
