Հայաստանի համար դժվարին պայմաններում «Ազգ»-ը դարձավ հոգևոր սնունդ մատուցող թերթ, որին ընթերցողները սպասում էին ամեն օր: Այս մասին մարտի 2-ին Երևանի պետական համալսարանում «Ազգ» թերթի 25-ամյակին նվիրված հանդիսությանը նշել է ՀՀ սփյուռքի նախարար Հրանուշ Հակոբյանը:
«Այսօր հայկական լրատվական աշխարհում մեծ հոբելյան է, «Ազգ»-ի 25-ամյակն է լրանում: Ուզում եմ ջերմորեն շնորհավորել այս գեղեցիկ հոբելյանի առթիվ և մաղթել նոր հոբելյաններ: Պարզվում է, որ «Ազգ»-ը Հայաստանի անկախությունից մեծ է. մենք անկախությունը հռչակեցինք սեպտեմբերի 21-ին, իսկ «Ազգ»-ն ստեղծվեց փետրվարի 16-ին: «Ազգ» օրաթերթի առաջին քայլերը շատ դժվար էին, քանի որ Հայաստանում ընդամենը երկու ժամ լույս կար. մենք ապրում էինք էներգետիկ ճգնաժամի և պատերազմի պայմաններում: Սարսափելի ծանր ու դրամատիկ օրեր էին: «Ազգ»-ը դարձել էր մեզ մխիթարող, հոգևոր սնունդ մատուցող թերթ, որին սպասում էինք ամեն օր»,- շեշտել է Հրանուշ Հակոբյանը:
ՀՀ սփյուռքի նախարարի խոսքով` «Ազգ»-ի հիմնադիր և գլխավոր խմբագիր Հակոբ Ավետիքյանը ստեղծեց հայկական լրատվական դպրոց, և թերթը շատ հայտնի լրագրողներ է տվել: Նախարարը Հակոբ Ավետիքյանին պարգևատրել է «Հակոբ Մեղապարտ» մեդալով:
ԵՊՀ Ժուռնալիստիկայի ֆակուլտետի դեկան Նաղաշ Մարտիրոսյանը շեշտել է, որ միջոցառմանը բոլորին համախմբել է«Ազգ»-ի նկատմամբ բացառիկ վերաբերմունքը, սերը և հավատը:
«Ազգ»-ը երբեք վստահության ճգնաժամ չապրեց: Թերթի 25-ամյակը նշում ենք 2016-ին, երբ երկու հզոր հոբելյան ունենք` Արցախի Հանրապետության և Հայաստանի անկախության 25-ամյակները: Հակոբ Ավետիքյանի խմբագրած «Ազգ»-ը հավաստում է, որ այն բացառիկ պատասխանատվություն ունի տպագիր խոսքի հանդեպ»,-շեշտել է նա:
Ժուռնալիստների միության նախագահ Աստղիկ Գևորգյանը խոստովանել է, որ «Ազգ»-ի անդավաճան ընթերցողն է:
«Ընթերցում եմ խմբագրականից մինչև վերջին տողը: «Ազգ»-ը պատասխանատու և որակյալ մամուլ է, բամբասանք, չճշտված տեղեկատվություն չեք գտնի: Հակոբ Ավետիքյանն արժանացել է մեր բոլոր պարգևներին, ինչքան ոսկի ունենք` տվել ենք: Շատ երջանիկ եմ, որ Ավետիքյանի ժամանակակիցն եմ»,-շեշտել է նա:
Հոբելյանին նվիրված հանդիսությանն ընթերցվել են բազմաթիվ շնորհավորական ուղերձներ: Ելույթ ունեցողները կարևորել են «Ազգ» -ի գործունեությունը:
