Կինոփառատոնի անցկացման շրջանում Կաննի հյուրանոցները, սովորական սակագների համեմատ, միջինը 180 տոկոսով բարձրացրել են համարների գինը: Գները հատկապես բարձր են եղել փառատոնի առաջին հանգստյան օրերին՝ մայիսի 17-19-ը: Այս մասին հայտնում է RIA Novosti-ն:
Այսպիսով՝ La Villa Toscana հյուրանոցն անցած հանգստյան օրերին մեկ գիշերվա համար պահանջել է 470 դոլար, մինչդեռ սովորական օրերին այն արժեր 74 եվրո: 5 աստղանի Cezanne-ն մեկ գիշերվա արժեքը հասցրել էր 1014 եվրոյի՝ սովորական օրերի 154 եվրոյի դիմաց, այսինքն՝ արժեքը բարձրացրել է 558 տոկոսով:
Հիշեցնենք, որ Կաննի 66-րդ կինոփառատոնն անցկացվում է մայիսի 15-26-ը: Ամեն տարի փառատոնին մասնակցելու համար քաղաք է այցելում 125 հազար օտարերկրացի:
