Մինչ ԱԺ մյուս խմբակցությունները, «Առաջին լրատվական»-ի տեղեկություններով, պատրաստվում են «դեմ» քվեարկել կառավարության ներկայացրած ծրագրին, ՕԵԿ-ը` իր 6 պատգամավորով «միանշանակ կողմ» է քվեարկելու: Երեկ զրուցեցինք ԱԺ ՕԵԿ խմբակցության անդամ Խաչիկ Հարությունյանի հետ:
– Պարոն Հարությունյան, ինչպե՞ս է քվեարկելու ՕԵԿ-ը կառավարության ներկայացրած ծրագրին:
– Ինչպես պետք է քվեարկի, իհարկե` կողմ:
– Կառավարության ծրագիրը, սակայն, քննադատության ենթարկվեց ԱԺ-ում, ասվեց, որ այն իրականությունից կտրված, ցանկությունների ծրագիր է: Վարչապետն էլ իր հերթին հայտարարեց, թե մեր երկրի խնդիրները լուծելու համար մենք ընդամենը մտածելակերպի փոփոխության խնդիր ունենք: Համամի՞տ եք:
– Չէ՛, մենք կոնկրետ ոլորտներում կոնկրետ փոփոխությունների խնդիր ունենք: Մենք արել ենք մեր առաջարկությունները, վաղը կհնչեն նաև այլ առաջարկություններ:
– Հնարավո՞ր է` ՕԵԿ-ը չէր էլ կարող այլ կերպ քվեարկել, դրա համար է կողմ քվեարկում:
– Էստեղ կարողությունների բան չէ: Որովհետև ՕԵԿ-ի նախընտրական ծրագրային դրույթներ կան կառավարության ծրագրի հիմքում դրված: Բացի դա, մենք անելու ենք նաև այլ առաջարկություններ, որոնք պայմանավորվածության արդյունքում կտեսնեք` կընդունվեն:
– Սակայն նույն կառավարությունն անցած հինգ տարիներին ձախողել է ծրագիրը, այս անգամ Դուք ինչպե՞ս եք կողմ քվեարկում:
– Դե, անցած հինգ տարիների ծրագրի ձախողման հետ կապված կառավարությունը բերեց հիմնավորումներ:
– Դե, այս անգամ էլ կարող է բերել, ի՞նչ խնդիր կա:
– Դե, գիտեք ինչ, Աստված մի արասցե, մի հատ էլ համաշխարհային ֆինանսատնտեսական ճգնաժամ լինի, չգիտեմ, թե եվրոպական երկրներն ու Հայաստանը որտեղ կհայտնվեն:
– Դե, կարող է կարկուտ էլ լինի…
– Եթե ֆորս-մաժոր եղավ, ինչ պետք ա անենք: Դրա դեմը որևէ ձևով առնել չի լինի:
– Տպավորությունն այն է, որ ՕԵԿ-ն այսօր չի կարողանում ընդդիմանալ ՀՀԿ-ին, քանի որ կոալիցիայի մեջ է:
– Ինչի` ընդդիմանալ: Ընդդիմանալու խնդիր չկա: Ես ասում եմ` մեր ծրագրային դրույթները ներառված են կառավարության ծրագրում: Ինչի մասին ա խոսքը, եթե մեր ծրագիրն էնտեղ կա: Եվ մենք էլ հետամուտ ենք լինելու, որ այն դրույթները, որոնք դրված են ծրագրի հիմքում, իրականություն դառնան:
– Պարոն Հարությունյան, ՕԵԿ-ը` լինելով իշխանության մաս, տանուլ տվեց Երևանի ընտրություններում: Սա չի՞ Նշանակում, որ ՕԵԿ-ի վարկանիշը էդպես էլ չի բարձրանում:
– Էդտեղ կային բավականին օբյեկտիվ և սուբյեկտիվ խնդիրներ, հիմա չանդրադառնանք դրանց: Դա առանձին թեմա է:
– Իսկ չե՞ք կարծում, որ ՕԵԿ-ի այս վարքագիծը կարող է նպաստել, որ ՕԵԿ-ի հանդեպ է՛լ ավելի անվստահություն առաջանա քաղաքացիների մոտ:
– Չեմ կարծում:
– Պարոն Հարությունյան, կառավարության ծրագրի իրականացումը կնպաստի՞ ՕԵԿ-ականների բիզնեսի զարգացմանը: ՕԵԿ նախագահ Արթուր Բաղդասարյանի բիզնեսներն ընդլայնվում են այս ընթացքում:
– Պրովոկացիոն հարցերին չեմ պատասխանում: …Բիզնեսներ չունի Արթուր Բաղդասարյանը:
– ՕԵԿ փոխնախագահ Հեղինե Բիշարյանը չի հերքում, որ Արթուր Բաղդասարյանը Ոսկեվազի կոնյակի գործարանը կառուցել է` իր խոստումը կատարելու և աշխատատեղեր ստեղծելու համար:
– Չէ՛, ես ասում եմ` բիզնեսներ չունի, պետական պաշտոնյա ա, ինչի մասին ա խոսքը: …Դե, եթե մարդը ունի սեփականություն կամ իր ընկերների միջոցով ինչ-որ գործեր է ուզում ձեռնարկել, ինչի մասին է խոսքը, կարելի է, եթե ներդրումներ են ապահովվում, դրսից գալիս են Հայաստան, կարծում եմ` պետք է խրախուսել:
– Իսկ «Իմպերիալ» հյուրանոցը իրենը չէ՞:
– Կեղծ տեղեկատվություն է, գնացեք, ճշտեք:
