Սպանված ժամկետային զինծառայող, շարքային 19-ամյա Լյուքս Ստեփանյանի հայրը՝ Աշխարհիկ Ստեփանյանը, պատմում է, որ որդու հոգեհանգստի ժամանակ իրենց տուն են եկել պաշտպանության նախարարության աշխատակիցները, հրամանատարական կազմը, որոնց իրենք հարցրել են, թե ինչ կարող են ասել որդու մասին, դեպքի մասին, բայց որևէ պատասխան չեն ստացել։ «Հրամանատարը և մյուսները՝ վեց-յոթ հոգի, նրանց բոլորին խնդրեցինք՝ ես, կինս, որդիս, մեկ բան ասացեք տղայիցս, նրանք որևէ բան չասացին մեր տղայի մասին»,- ասաց հայը՝ հավելելով, որ նրանց իրենց տնից վռնդել են:
Այնուհետև հայրն իմացել է, որ հորեղբոր տղայի մոտ 300.000 դրամ գումար են թողել և անմիջապես փողը հետ է վերադարձրել։ «Հա՞ց էիք ուզում ուտել, գնացեք ռեստորան հաց կերեք, ես միլիոնների քյասիբ եմ, բայց ես 300 հազարների քյասիբ չեմ: Խի դրանց փողո՞վ ես պետք է որդուս թաղումն անեի»,- հուզված ասաց հայրը:
Նա նշեց, որ ինքն ու կինն են որոշել Երևան տեղափոխել տղայի դին։ «Մենք երկրից էինք ուզում գնալ»,- ասաց հայրը։
Հիշեցնենք, որ շարքային Դավիթ Խաչատրյանն իրեն ամրակցված ինքնաձիգից կրակել է շարքային Լյուքս Ստեփանյանի ուղղությամբ, որի հետևանքով վերջինս գլխի շրջանում ստացել է հրազենային վնասվածք և տեղում մահացել, իսկ նույն ՀԴՆ-ի ժամկետային զինծառայող, շարքային Հրաչյա Սարգսյանը գլխի շրջանում ստացել է հրազենային վնասվածք և տեղափոխվել Նոյեմբերյանի քաղաքային հիվանդանոց:
Լուսանկարները՝ Photolure-ի
