Չի բացառվում, որ ոչ պետական բուհերի ուսանողները դուրս գան և իրենց ուժերը փորձեն պետական բուհերում: Այս մասին այսօր հրավիրված ասուլիսի ընթացքում տեղեկացրեց Գնահատման և թեստավորման կենտրոնի մշակումների և կազմակերպական բաժնի պետ Կարո Նասիբյանը:
Նրա խոսքերով, 1-ին փուլում հայտագրված 1209 դիմորդների միջին տարիքը 19 տարեկանն է: «Բացի այս միջինից, մենք ունենք նաև 46 տարեկան դիմորդ: Քիչ չեն այն շրջանավարտները, ովքեր միջնակարգ դպրոցը ավարտել են մինչև 2000 թ.:
Մենք նաև ոչ հասկանալի փաստերի առաջ ենք կանգնել. օրինակ՝ շրջանվարտ կա, որը դիմում-հայտերում ցանկացած քննություն գրել է: Օրինակ՝ ինչպես հասկանալ այս շրջանավարտին, որը նշել է հայոց լեզու և հայ գրականություն, ռուսաց լեզու, հայոց պատմություն, անգլերեն, մաթեմատիկա և ընդհանուր պատմություն: Կամ մյուսը՝ հայոց լեզու և հայ գրականություն, աշխարհագրություն, գերմաներեն, մաթեմատիկա, ընդհանուր պատմություն:
Բնականաբար, եթե նա ցանկություն ունի հանձնելու միասնական քննություն, մենք չենք կարող նրան մերժել, բայց թե ինչ մասնագիտությամբ է ցանկանում սովորել այս դիմորդը՝ մեզ համար մնում է հարցական:
Ունենք նաև այսպիսի դիմորդ՝ հայոց լեզու և հայ գրականություն, հայոց պատմություն, անգլերեն, քիմիա, ֆիզիկա: Բնականաբար, այս դիմորդների թիվը մեծ չէ, և դիմորդները հիմնականում նպատակաուղղված են իրենց ընտրած մասնագիտություններին»:
Ի դեպ, Կարո Նասիբյանի խոսքերով, տպավորություն է ստեղծվում, թե այս տարվա ընդունելության քննությունները շատ հեշտ են լինելու, և դրանք հաղթահարելն էլ շատ հեշտ է լինելու, սակայն դա այդպես չէ, քանի որ քննություններն ընթանալու են այնպես, ինչպես նախկինում: