Հոլիվուդյան դերասան Լեոնարդո Դի Կապրիոն, որն «Օսկարի» է արժանացել «Տղամարդու լավագույն դեր» անվանակարգում «Վերապրածը» ֆիլմում որսորդ Հյու Գլասի դերակատարման համար, երախտիքի խոսքեր է հայտնել կինոակադեմիային և գործընկերներին, նաև հիշեցրել կլիմայական խնդիրների մասին: Դերասանի խոսքերը մեջբերում է Reuters-ը:
«Կլիմայական փոփոխություններն իրական են, դա տեղի է ունենում հենց հիմա: Մենք պետք է միասին աշխատենք»,- նշել է Դի Կապրիոն:
Դա 41-ամյա Դի Կապրիոյի կարիերայում առաջին «Օսկարն» է:
Մեքսիկացի ռեժիսոր Ալեխանդրո Գոնսալես Ինյարիտուն, որը նկարահանել է «Վերապրածը», երկրորդ տարին անընդմեջ մրցանակ է ստանում լավագույն ռեժիսուրայի համար (2015թ. նա «Օսկարի» է արժանացել «Բերդմենի» համար): «Վերապրածը» մրցանակ է ստացել նաև «Լավագույն օպերատորական աշխատանք» անվանակարգում:
Դի Կապրիոն հետաքրքրվում է բնապահպանական հարցերով, նա 1998թ. հիմնել է սեփական բնապահպանական հիմնադրամը: Կազմակերպությունն աջակցում է մի շարք նախագծերի Կալիֆոռնիայում, վեբ-կայքերի միջոցով զբաղվում բնապահպանական ակցիաների քարոզչությամբ:
