ԱԺ ՕԵԿ խմբակցության պատգամավոր Հովհաննես Մարգարյանը «Առաջին լրատվական»- ի հետ զրույցում ներկայացրեց իր գնահատականը Արթուր Բաղդասարյանի հարցազրույցի վերաբերյալ, որում անդրադառնալով ռուս-թուրքական հնարավոր պատերազմին, նա նշել էր, որ եթե պատերազմը դուրս գա Սիրիայի տարածքից, Հայաստանը պետք է անի ամեն ինչ, որպեսզի աջակցի Ռուսաստանին:
«Օրինաց երկիր» կուսակցությունը, որը ԵԺԿ անդամ է, փաստորեն հանդես է գալիս պրոռուսկան դիրքերից:
Հ. Մարգարյանի դիտարկմամբ՝ ոչ ոք չի կարող ժխտել, որ մենք ՀԱՊԿ անդամ ենք: Նրա խոսքով՝ մենք պետք է ավելի խորացնենք այդ շրջանակներում մեր համագործակցությունը:
«Պարոն Բաղդասարյանն արդարացիորեն նշել է, որ ՀԱՊԿ շրջանակներից բացի՝ կան նաև հայ-ռուսական ռազմատեխնիկական, ռազմավարական մի շարք պայմանագրեր և փաստաթղթեր: Սա նշանակում է, որ եթե զինված հարձակում լինի, պետք է Հայաստանը աջակցություն ցուցաբերի և հակառակը: Ռուսական կողմից ևս այսպիսի կարծիքներ են հնչում, որ «եթե հայերի վրա հարձակվեն, մենք նրանց կոկորդը կկրծենք»: Սա չի նշանակում, որ մենք հակադրության մեջ ենք մտնում տարբեր միջազգային հեղինակավոր ռազմական կազմակերպությունների, այդ թվում նաև ՆԱՏՕ-ի հետ,- նշեց Հ. Մարգարյանը:
Հովհաննես Մարգարյանի կարծիքով՝ որևէ շտապողականություն չկա Արթուր Բաղդասարյանի դիրքորոշում արտահայտելու մեջ, և ոչ էլ որևէ վտանգ կա:
Անդրադառնալով ներքաղաքական կյանքին Հ. Մարգարյանը նշեց, որ այսուհետ ևս շարունակելու են համագործակցությունը բոլոր գործընկերների հետ, մասնակցելու են նաև նոր ԸՕ ձևավորման աշխատանքներին:
ՕԵԿ պատգամավորը մեկնաբանեց իր և իր կուսակիցների կողմից հնչող «Թալանչիները պիտի հեռանան» կոչին. «Այսօրվա դրությամբ անհրաժեշտություն է մեր ազգի համար, որ մեր երկրում փոփոխություն լինի: Այսօր Հայաստանի գանձարանը դատարկ է, 1 գրամ ոսկի չունի Հայաստանը՝ որպես հանք ունեցող երկիր: Պաշտոնյա միլիարդատերերին, որոնց հաստատ պապերը չեն թողել այդ գումարը, ուզում եմ հարց տալ. ո՞նց են հանգիստ խղճով քնում:
Մանրամասները՝ տեսանյութում:
