ԱՄՆ Տեխասի համալսարանի 24-ամյա ուսանող Քոդի Ուիլսոնը փորձարկել է աշխարհում առաջին ատրճանակը, որն ամբողջությամբ տպվել է 3D տպիչով, և այդ ամենն արել է տնային պայմաններում: Ինչպես հաղորդում է Vesti-ն, այս մշակումը բարկացրել է սենատորներին, որոնք պահանջում են գծագրերը ջնջել համացանցից:
«Կարելի է ասել, որ մենք մեկ քայլ առաջ ենք գնում: Այժմ զենքը հնարավոր է տպել բառիս բուն իմաստով: Ցանկացած վայրում, որտեղ կա համակարգիչ, կարող է նաև զենք հայտնվել»,- ասել է Ուիլսոնը:
Երիտասարդը պնդում է, որ ինքը ցանկանում է ամբողջ աշխարհին ցույց տալ, թե որքան վտանգավոր կարող է դառնալ ապագան, երբ հնարավոր լինի ձեռք բերել՝ ինչ ուզես և որտեղ ուզես:
Ամերիկացի քաղաքական գործիչները, նախևառաջ՝ դեմոկրատները, արդեն խոսում են տնային ահաբեկչության սպառնալիքի մասին:
«Իրավիճակն այնպիսին է, որ ցանկացածը, այդ թվում՝ հանցագործը կամ ահաբեկիչը կարող է իր ավտոտնակում զենքի գործարան բացել, և այդ մասին ոչ ոք չի իմանա»,- ասել է Դեմոկրատական կուսակցության սենատոր Չարլզ Շումերը:
