Վերջին օրերի քաղաքական սկանդալները առայժմ չեն ազդել ԱՄՆ նախագահ Բարաք Օբամայի վարկանիշի վրա: Այդ մասին են վկայում կիրակի հրապարակված հարցման արդյունքները: Հարցումն անցկացրել են CNNն ու ORC ընկերությունը՝ հայտնում է RIA Novosti-ն:
Վերջին շաբաթը Օբամայի նախագահության ողջ ընթացքում ամենածանրն էր: Նրա վարչակազմը ստիպված էր արդարանալ Բենղազիում ԱՄՆ դեսպանության 4 աշխատակցի սպանության, ինչպես նաև Associated Press լրատվական գործակալությունում զանգերի վերծանման և հարկային մարմինների կողմից ընդդիմադիրների կազմակերպություններում ընտրողական ստուգման կապակցությամբ:
Հարցման արդյունքներով՝ հարցվածների 53%-ը հավանության է արժանացնում Օբամայի գործողությունները, 45%-ը՝ ոչ:
Ապրիլին Օբամայի վարկանիշը 51% էր: Մայիսին անցկացված հարցման հետ տարբերությունը կազմում է 3%, ինչը միանգամայն տեղավորվում է վիճակագրական տատանումների մեջ:
Gallup ընկերության հարցումը ցույց է տվել Օբամայի վարկանիշի ոչ մեծ աճ:
Բացի այդ՝ CNN-ի հարցախույզին մասնակցածների ավելի քան 70%-ը բավարարված է Օբամայի բացատրություններով: Նա ասել էր, որ չի իմացել աջ ակտիվիստների նկատմամբ ընտրողական ստուգման մասին:
55%-ի կարծիքով՝ հարկայինները գործել են ինքնուրույն, իսկ 37%-ը համարում է, որ IRS-ը գործել է վարչակազմի թելադրանքով:
Հարցումը անցկացվել է մայիսի 17-18-ը՝ հեռախոսային հարցազրույցի միջոցով: Հարցմանը մասնակցել է ԱՄՆ 923 չափահաս բնակիչ:
