Վրաստանում Եվրամիության անդամ երկրների դեսպանները հայտարարել են, որ զարմացած են բռնությամբ, որը տեղ է գտել նախօրեին Թբիլիսիում կայացած գեյ-շքերթի ժամանակ, հաղորդում է «Գրուզիա Օնլայն»-ը:
«Ազատ արտահայտվելը մարդու հիմնական իրավունքն է, որը պետք է հասանելի լինի բոլորին: Ցավալի է, որ խաղաղ ցույցն առաջացրեց բռնի դիմադրություն այլ ակցիայի մասնակիցների կողմից: Բոլորն ունեն սեփական կարծիքն արտահայտելու իրավունք: Ուրիշների կյանքի և մտքերի հանդեպ հանդուրժողականությունը եվրոպական և միջազգային արժեքների հիմքն է»,- ասվում է հայտարարության մեջ:
Հիշեցնենք, որ մայիսի 17-ին Թբիլիսիի կենտրոնում, որտեղ նախատեսվում էր գեյ-շքերթ, հավաքվել էին հազարավոր մարդիկ`«ի պաշտպանություն բարոյականության», որոնք սկսել են հետապնդել ԼԳՏԲ (լեսբուհի, գեյ տրանսվիստիտ, բիսեքսուալ) ներկայացուցիչներին: Արդյունքում խափանվեց սեռական փոքրամասնություններին աջակցող ակցիան, որը նվիրված էր հոմոֆոբիայի դեմ միջազգային օրվան: Բախումների հետևանքով տուժել է 28 մարդ:
