Բրիտանական Reuters լրատվական գործակալության փոխանցմամբ՝ Թուրքիայի վարչապետ Ահմեթ Դավութօղլուն հրապարակել է երկրի զբոսաշրջային ոլորտին աջակցելու պլանը։
Ռուսաստանի հետ հարաբերություններում ծագած ճգնաժամից տուժած զբոսաշրջային ինդուստրիան փրկելու համար Թուրքիայի իշխանությունները մտադիր են հատկացնել 255 միլիոն լիրա (87 միլիոն դոլար)։ Պլանով նախատեսվում է նաև վերափոխել զբոսաշրջային ընկերությունների պարտքերը։
Ընդգծվում է, որ Թուրքիայի հանգստավայրերի հռչակը գերմանացի զբոսաշրջիկների շրջանում նվազեց 2016 թվականի հունվարին Ստամբուլում իրականացված ահաբեկչությունից հետո, երբ պայթյունի հետևանքով զոհվեց Գերմանիայի 10 քաղաքացի։
