Կառավարության հրավիրած ԱԺ արտահերթ նիստին այսօր քննարկվող «ՀՀ կառավարության կառուցվածքի մասին» ՀՀ օրենքում լրացում և փոփոխություն կատարելու մասին նախագծի քննարկմանը ՀԱԿ խմբակցության ղեկավար Լևոն Զուրաբյանը իր ելույթում հայտարարեց. «Ի՞նչն է դրդել ՀՀԿ-ին, որ այդպիսի լուրջ զիջումների գնա հանուն ՀՅԴ, քանի որ ՀՅԴ-ին հաջողվեց թելադրել գործարքի իր պայմանները: 2017թ. ընտրություններին ընդառաջ Սերժ Սարգսյանի համար վտանգ կար, որ ընտրություններից առաջ Ռոբերտ Քոչարյանին կհաջողվեր ստեղծել դաշինք, որի մեջ կներառվեր նաև Դաշնակցությունը: Սա էր պատճառը, որ Սերժ Սարգսյանը ամեն գնով փորձեց ներգրավել ՀՅԴ-ին կոալիցիայի մեջ»:
«Գնացեք, հանգիստ նստեք, պարոն: Մենք տասնհինգ ամիս անց նոր նախագիծ ենք ներկայացրել, քանի որ ՀՀ-ն այսօր ապրում է նոր քաղաքական իրողությունների պայմաններում ու նոր Սահմանադրությամբ ու երկու ուժեր միացնում են իրենց ջանքերը հանուն ՀՀ, ԼՂՀ: Հարգելի պարոն, սա քաղաքական գործարք չէ, համագործակցություն է, միգուցե դրանք եղել են ձեզ մոտ, որի արդյունքում մեկ օրվա մեջ փոշիացաք: Կոալիցիայի մասին խոսեցիք, բայց սա համագործակցություն է: Եթե 2017թ. ընտրությունը հաջող անցկացնենք, ապա երկարատև է լինելու մեր համագործակցությունը:
Մենք թշնամիներ ու հաղթանակներ տոնելու պատճառներ չունենք, քանի որ ՀՀ-ում մեզ համար բոլորը յուրային են, այդ թվում՝ նաև դուք: Նայեք մի հատ ձեր ու ձեր դիմացի շարքերը. եթե ՀՀ-ում որևէ ուժի ասել են ոչ, ապա դա ասել են ձեզ ձեր երբեմնի համախոհները: դուք գնացեք ձեր դարդը լացեք, մեզնով մի մտահոգվեք…»,- Լևոն Զուրաբյանին արձագանքեց Էդուարդ Շարմազանովը:
Մանրամասները՝ տեսանյութում
