Լոնդոնի համալսարանական քոլեջի և Բարսելոնի համալսարանի հետազոտողների խումբը վիրտուալ իրականության միջոցով մշակել է գործիք, որը կլինիկական հոգեբաններին օգնում է աշխատել սթրես, ընկճախտ ապրող, ցածր ինքնագնահատական ունեցող մարդկանց հետ: Այս մասին հայտնում է The Washington post-ը՝ հղում անելով Բրիտանական բաց հոգեբուժության ամսագրում հոդվածին:
Հաղորդվում է, որ սիմուլյացիան հիվանդին հնարավորություն է տալիս ավելի հեշտ հանգստանալ, լսել իր «ներքին ձայնին» և ընդունել իրեն:
Սիմուլյացիան երկու փուլ է ներառում: Առաջին փուլում հիվանդը տեսնում է լացող վիրտուալ երեխայի, որին անհրաժեշտ է հանգստացնել: Բոթը արձագանքում է բարի խոսքերին ու դրական ինտոնացիային:
Երկրորդ փուլում հիվանդը ինքն է հանդես գալիս երեխայի դերում: Բոթը հասուն մարդ է, նրան դիմում է նույն ինտոնացիայով ու նույն բառերով, ինչ ասել է հիվանդը առաջին առաջին փուլում:
Մեկ ամիս օրական 3 անգամ 8-րոպեանոց պրոցեդուրաները կրկնելուց հետո հիվանդների մեծ մասի դեպքում արձանագրվել է ընկճախտի նշանների անհետացում: Ոմանք ասել են, որ սկսել են իրենց ավելի բարությամբ վերաբերվել: Լոնդոնի համալսարանական քոլեջի կլինիկական հոգեբան Քրիս Բրյուինը՝ հետազոտական խմբի ղեկավարը, նշել է, որ բոլոր հիվանդները հետազոտությունից առաջ չեն կարողացել պայմանավորվել իրենք իրենց հետ:
