«Վերջին մի քանի օրերին շատ-շատ վնասներ եղան, պարբերաբար հրթիռներ են նետվում քաղաքի վրա։ Միայն առավոտյան է գնդակոծությունը դադարում, որից հետո հնարավոր է լինում երեխաներին դպրոց տանել։ Սարսափելի վիճակ է»,- «Առաջին լրատվական»-ի հետ զրույցում ասաց Հալեպի Հայ ավետարանական համայնքի համայնքապետ, վերապատվելի Հարություն Սելիմյանի տիկինը՝ Շողակ Սելիմյանը, անդրադառնալով վերջին օրերին Հալեպում ստեղծված վիճակին։
Նրա խոսքով՝ այս օրերին շատ շինություններ են հողին հավասարվել, շատ հայ, արաբ քրիստոնյաներ են զոհվել։ «Չգիտեմ, թե այս վիճակով ուր կհասնենք, ահավոր վիճակ է։ Այս պահին խոսակցություններ կան, որ բանակցություններ են տարվում այս վիճակից դուրս գալու համար, բայց հավանաբար դրա համար ժամանակ է պետք»,- հավելելց տիկին Սելիմյանը։
Ըստ տիկին Սելիմյանի՝ այս օրերին, Հալեպի վիճակով պայմանավորված, շատ են քաղաքից հեռացողները։ «Արդեն 20 օրից ավել կլինի, որ գազ, էլեկտրականություն չկա, ջուր չկա, եղածն էլ դարձել է վճարովի։ Բնավ ջուր չկա, բայց հատուկ միջոցներ, կազմակերպություններ կան, որոնց մարդիկ հեռաձայնի միջոցով ջուր կխնդրեն, և այդ ընկերությունները գալիս ու գումարի դիմաց մարդկանց որոշակի չափով ջուր են բաժանում։ Այս ամենը հիմնավոր պատճառ է, որ մարդիկ կամաց-կամաց հեռանան։ Ով որ կարողություն ունի, նյութական վիճակը ներում է, ուրիշ ելքեր գտնում են, իսկ առավել անապահովները քաղաքը լքելու ճանապարհն են բռնում»,- ասաց մեր զրուցակիցը՝ հավելելով, որ հեռացողները հիմնականում ապաստան են գտնում Կանադայի Տորոնտո և Մոնրեալ քաղաքներում, իսկ ով հնարավորությու ունի, սկզբում մեկնում է Լաթաքիա, ապա Բեյրութում առժամանակ մնալուց հետո այլ՝ հիմնական բնակության վայր է գտնում։
Նշենք, որ Սիրիայում պայքարի կենտրոնը դառնում է Հալեպը, և վտանգվում է ոչ միայն Սիրիայում պատերազմի ելքը, այլև աշխարհաքաղաքական հետևանքներն ամբողջ տարածաշրջանի համար։ Վերջին օրերին Հալեպում սիրիական բանակը հաջող արշավ է սկսել ռուսական զորքերի և քուրդ աշխարհազորայինների աջակցությամբ։ Սիրիական բանակի մարտիկներին հաջողվել է վերահսկողություն հաստատել Ախրաս և Միսկան բնակավայրերի նկատմամբ: Իրենց հերթին, քուրդ աշխարհազորայինները այս շաբաթ գրավել էին Թալ Ռիֆաթ քաղաքը, որը համարվում էր իսլամիստների հենակետերից մեկը Հալեպ նահանգում։ Քրդերը զինյալներին դուրս են մղել նաև Թալ Ռիֆաթի մերձակայքում գտնվող Կֆար Նասեխ ոչ մեծ բնակավայրից: