Կենտրոն և Նորք-Մարաշ վարչական շրջանների ընդհանուր իրավասության դատարանում Արմեն Բեկթաշյանի նախագահությամբ ավարտվել է Նաիրա Պ.-ի գործի դատական քննությունը:
42-ամյա Նաիրան մեղադրվել է նախնական համաձայնությամբ ծանր հանցագործության կատարման մեջ մի խումբ մարդկանց վերաբերյալ սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով:
Ըստ մեղադրանքի՝ 2014 թվականի նոյեմբերի 3-ին Նաիրան ոստիկանության ԿՀԴՊ գլխավոր վարչությունում իրականությանը չհամապատասխանող հաղորդում է տվել, թե 2014 թվականի հոկտեմբերի 18-ին կամ 19-ին Աբովյան քաղաքից չորս տղամարդիկ՝ երկու եղբայրներ ու նրանց երկու ընկերները, իր նկատմամբ բռնություն են գործադրել, բացահայտ առևանգել են, նստեցրել են «ԲՄՎ» մակնիշի մեքենա ու տեղափոխել են Երևան քաղաքում գործող «Բոհեմ» հյուրանոցային համալիր:
Առևանգման հոդվածով քրեական գործ է հարուցվել, Նաիրան ճանաչվել է տուժող:
Սակայն քննության ընթացքում՝ 2015 թվականի փետրվարին, հանցակազմի բացակայության հիմքով այդ գործը կարճվել է, իսկ Նաիրան տուժողից վերածվել է սուտ մատնության համար մեղադրվող անձի:
Ընդհանուր իրավասության դատարանում Նաիրան իրեն մեղավոր է ճանաչել մեղսագրված հոդվածով, նրա միջնորդությամբ գործը քննվել է արագացված կարգով:
Դատարանը հաշվի է առել, որ Նաիրան նախկինում եղել է դատապարտված՝ նրա մի քանի դատվածությունները մարված են, բայց վերջին դատվածությունը մարված չէ:
Երևանի Ավան և Նոր Նորք վարչական շրջանների ընդհանուր իրավասության դատարանի՝ 2011 թվականի մարտի 16 –ի դատավճռով գողությունների համար Նաիրան մեղավոր էր ճանաչվել ու դատապարտվել 6 տարի ազատազրկման:
2013 թվականի նոյեմբերի 22-ին նա համաներումով ազատ է արձակվել:
Սակայն դեռ դատվածությունը չմարված՝ 2014 թվականի նոյեմբերի 3-ին կատարել է միջին ծանրության նոր հանցագործություն՝վերը նկարագրված սուտ մատնությունը:
Նկատի ունենալով այս հանգամանքը՝ դատարանը Նաիրա Պ.-ի վերաբերյալ արձանագրել է հանցագործությունների կատարման ռեցիդիվ և դատավճռում արձանագրել է. «Նաիրա Պ.-ն համարվում է ռեցիդիվիստ»:
Նաիրա Պ.-ն մեղավոր է ճանաչվել սուտ մատնություն կատարելու համար՝ ՀՀ քրեական օրենսգրքի 333 հոդվածի 2-րդ մասի 1-ին կետով, և դատապարտվել է 2 տարի 6 ամիս ազատազրկման:
Նաիրան կալանքի տակ է առնվել անհապաղ՝ հենց դատական նիստերի դահլիճում:
