Քաղաքական և ընտրական տեխնոլոգիաների փորձագետ Արմեն Բադալյանը «Առաջին լրատվական»-ի հետ զրույցում գնահատելով Սերժ Սարգսյանի փետրվարի 12-ի ելույթը՝ նկատեց, որ ելույթի ձևաչափը ընդօրինակվել է ՌԴ նախագահ Վլադիմիր Պուտինի ուղերձներից:
Սակայն Արմեն Բադալյանի խոսքով՝ «չի կարելի ուրիշի համար ձևված կոստյումը հագնել՝ առավել ևս, երբ քեզ համար այդ կոստյումը չունի աստառ, թևեր, գրպաններ, որովհետև ի տարբերություն Սերժ Սարգսյանի՝ Պուտինը նման ելույթներ ունենում է ամեն տարի, ոչ թե իր կառավարման վերջին շրջանում»:
Ինչպես նկատեց Արմեն Բադալյանը՝ «բովանդակային առումով ելույթի յուրաքանչյուր պարբերությունն ու իրականությունը միմյանց հետ ոչ մի առնչություն չունեն: 8 տարվա ընթացքում, որը բավականին մեծ ժամկետ է Հայաստանի նման փոքր երկրի համար, երբ մենք տեսնում ենք, որ նրա ելույթի կետերից և ոչ մեկը չի կատարվել, ապա դրանից հետո դրանք ընդամենը դասվում են մեծ ժամկետում մոռացվող ելույթների շարքին»:
Անդրադառնալով ՀՀ նախագահի ելույթում տեղ գտած վերադասավորումների խնդրին՝ մեր զրուցակիցն ասաց. «Հայաստանում ամեն ինչ հնարավոր է՝ 2018 թվականին կարող է նույն անձը լինել և նախագահ, և վարչապետի պաշտոնակատար: Սակայն էականն այն է, որ 2017 թվականին վարչապետ լինելու ցանկություն ունի նաև գործող վարչապետը, որը մի քանի անգամ հայտնել է բավականին բարձր պաշտոն զբաղեցնելու իր ցանկության մասին: Իսկ որպեսզի գործող վարչապետը հետագայում վարչապետի հայտ չներկայացնի, բնականաբար՝ նրան պետք է չեզոքացնել: Իսկ վերջինին չեզոքացնելու համար պետք է նրա դիրքերը թուլացվեն: Այդ նպատակով էլ ցանկալի է կոալիցիայի ձևավորումը, իսկ կոալիցիոն կառավարության մեջ եղած նախարարները դե ֆակտո ենթարկվելու են նախագահին»:
Ինչպես գիտենք, կոալիցիոն բանակցությունները վարում են ոչ թե կուսակցության ղեկավար գործիչները, այլ վարում է անձամբ նախագահը, ուստի քաղաքագետի կարծիքով՝ «սրանք կոալիցիոն բանակցություններ են ոչ այնքան ՀՀԿ-ՀՅԴ-ի, որքան գործող նախագահ-ՀՀԿ-վարչապետ-ՀՅԴ-ի միջև»:
