ԱՄՆ արդարադատության նախարարությունը Associated Press լրագրողների հեռախոսազրույցների գաղտնալսման մասին որոշումն ընդունել է՝ կապված Եմենում ԿՀՎ հատուկ օպերացիայի մասին տեղեկատվական արտահոսքի հետաքննության հետ: Այս մասին հայտնում է Reuters գործակալությունը՝ հղում անելով ԱՄՆ կառավարության պաշտոնյաներին:
Հետաքննությունը նախաձեռնվել էր 2012-ի մայիսին՝ կապված Associated Press-ում հայտնված մանրամասն տեղեկատվության հետ, որում պատմվում էր Եմենից ԱՄՆ ուղևորվող օդանավում ահաբեկչության կանխման ԿՀՎ օպերացիայի մասին: Հետաքննությունների դաշնային բյուրոյի կողմից անցկացված հետաքննության շրջանակում հարցաքննվել են արդարադատության նախարարության, ԱՄՆ անվտանգության ծառայության և ազգային անվտանգության խորհրդի, ինչպես նաև հենց Հետաքննությունների դաշնային բյուրոյի աշխատակիցները:
Լրագրողների հեռախոսազրույցների անօրինական գաղտնալսման մասին հայտարարությունը հասարակական մեծ հնչեղություն էր ստացել: Մայիսի 14-ին բաց նամակով արդարադատության նախարարությանն էին դիմել ավելի քան 50 ամերիկյան ԶԼՄ-ներ, որոնք քննադատել էին նախարարության գործողություններն ու պահանջել մամուլի ազատության պաշտպանությանն ուղղված հավելյալ միջոցառումներ: Հաջորդ օրը Սպիտակ տանը հայտարարել էին օրինագծի աջակցման մասին, որը կոչված է պաշտպանելու լրագրողներին տեղեկատվության աղբյուրները թաքցնելու անհրաժեշտության դեպքում:
