ԱՄՆ Նյու Հեմփշիր նահանգի Կին քաղաքի իշխանությունները դատի են տվել «Ռոբին Հուդը և նրա ուրախ տղաները» խմբավորմանը, որը «փարքոմատների» մեջ անծանոթների փոխարեն գումարներ է գցել հենց տեսուչների քթի տակ, որոնք պատրաստվել են տուգանել կարգազանց վարորդներին:
Կայանելու ժամանակի երկարացման համար վճարելուց հետո տեղական «Ռոբին Հուդերը» մեքենայի ապակու վրա հուշաթերթիկ են թողել հետևյալ գրառմամբ. «Ձեր ժամանակը լրացել է սակայն մենք երկարացրել ենք այն: Խնդրում ենք, սրանից հետո մի մոռացեք կայանելու համար նախօրոք վճարել»: Ներքևում հասցե է գրվում, ուր մարդիկ կարող են հանգանակություն ուղարկել՝ որպես երախտագիտություն՝ տուգանքից փրկվելու համար:
Քաղաքապետարանի հայցում ասվում է, որ այդ տղաները դիտմամբ են բարկացրել տուգանքներ գրող երեք սպաներին: Նրանք խմբավորման մշտական ճնշումների պատճառով հեռացել են աշխատանքից, և այժմ քաղաքը ստիպված նոր մարդիկ վարձել այդ աշխատանքը կատարելու համար:
«Վաշինգտոն Թայմս»-ի տվյալներով՝ քաղաքը դատարանին խնդրում է կայանելու տարածքի շուրջ 50 ֆուտ «անվտանգության գոտի» ստեղծել, որպեսզի խմբավորման անդամները չկարողանան մոտենալ տեսուչներին:
Սպաների գրավոր ցուցմունքներում ասվում է, որ խմբավորման անդամները հետապնդել են իրենց, շրջափակել և խանգարել են կատարել իրենց աշխատանքը:
«Ռոբին Հուդը և նրա ուրախ տղաները» հերքում են իրենց առաջադրված մեղադրանքները՝ ասելով, որ իրենք միայն բարի գործ են կատարել:
