ԲՀԿ խորհրդարանական խմբակցության քարտուղար Նաիրա Զոհրաբյանը zham.am-ին տված հարցազրույցում անդրադառնալով կուսակցության առաջնորդ Գ․ Ծառուկյանի երեկվա հայտարարությանը, թե ԲՀԿ-ն ընդդիմություն դառնալ չի կարող՝ այլ տրամաբանական պատասխան չունենալով հիշատակել էր այն մարդկանց, ովքեր ժամանակին Հայ ազգային կոնգրեսի և «Բարգավաճ Հայաստանի» համագործակցությունը չընդունելով դուրս էին եկել ՀԱԿ դաշինքից․ «Այո՛, մենք չենք լինելու ընդդիմություն, որը ժողովրդին մի բան է ասում, բայց իշխանական կուլիսներում շրջելուց հետո տրամագծորեն հակառակ քայլեր անում: Այո՛, մենք չենք լինելու ընդդիմություն, որը հազարավոր մարդկանց կարող է տանել հնարավոր առճակատման ու գնալ Ծիծեռնակաբերդ: Մենք չենք պատրաստվում լինել նաև դավիթշահնազարյանների, արամսարգսյանների, մակեյանների, գիմիշյանների և նմանների պես ընդդիմություն»:
«Առաջին լրատվական»-ի հետ զրույցում «Հանրապետություն» կուսակցության անդամ Լյովա Եղիազարյանն անդրադառնալով իրեն այլընտրանք հռչակած «Բարգավաճ Հայաստան» կուսակցության պատգամավոր Ն․ Զոհրաբյանի հայտարարությանը՝ ասաց․ «Արամ Զ․ Սարգսյանը երբևէ ԲՀԿ-ից և մանավանդ տիկին Նաիրայից չի պահանջել դառնալ ընդդիմություն. նման խնդիր իր առաջ դրել էր Լևոն Տեր-Պետրոսյանը, հետևաբար եթե ԲՀԿ-ն դառնա ընդդիմություն, ապա կարող է նմանվել Լևոն Զուրաբյանին, Գագիկ Ջհանգիրյանին կամ ամենաքիչը՝ Աշոտ Սարգսյանին»:
