Ադրբեջանական Turan լրատվական գործակալության փոխանցմամբ՝ Ադրբեջանի պետական նավթային ընկերությունը (SOCAR) հուսով է «Գյունշելի» հանքավայրի թիվ 10 հարթակում վերանորոգման աշխատանքներ իրականացնել մինչև մայիսի վերջ։
Այդ մասին IP Week-ի շրջանակներում լրագրողների հետ զրույցում հայտարարել է SOCAR-ի ղեկավար Ռովնագ Աբդուլաևը. «Վերջին հորատանցքի հրդեհի մարումից անմիջապես անց մենք կսկսենք հարթակի վերանորոգումը։ Դա կպահանջի 3-4 ամիս։ Ողջ հզորությանը մենք կփորձենք հասնել մինչև մայիսի վերջ՝ կարգի բերելով հանքավայրը։ Նրանում արդյունահանումը կազմում էր 1.3 միլիոն խորանարդ մետր գազ ու 1000 տոննա նավթ»։
Աբդուլաևը հավելել է, որ SOCAR-ն այս տարի ակնկալում է 500.000-600.000 տոննայով նավթի արդյունահանման նվազում՝ համեմատած նախորդ տարվա հետ։ «Գյունշելի» հանքավայրի հրդեհը բռնկվել է 2015 թվականի դեկտեմբերի 4-ին։ Այն ամբողջովին մարվել է միայն 2016 թվականի փետրվարի 10-ին՝ 68 օր անց։
