«Օմար Ալ-Ֆարուկի ջոկատներ» սիրիական ապստամբական խմբավորման հիմնադիր Խալիդ Ալ-Համադը, որը հայտնի է Աբու-Սաքար մականվամբ, և որին կասկածում են կառավարական զորքերի զինվորի ներքին օրգանն ուտելու մեջ, անձամբ հաստատել է, որ տեսանյութում պատկերվածն ինքն է: Skype-ի միջոցով Time-ին տված հարցազրույցում նա հայտարարել է, որ չի զղջում արածի համար:
Երեկ համացանցում հայտնվել էր տեսանյութ, որում Աբու-Սաքարը դանակով կտրում է մահացած զինվորի կրծքավանդակը, հասնում ներքին օրգաններին, հանում ինչ-որ օրգան ու կծում այն: Որոշ պարբերականներ հայտնել էին, որ դա զինվորի սիրտն է, մյուս մասը հայտնել էր, թե լյարդն է: Սակայն վիրաբույժը, որը Time-ի խնդրանքով ուսումնասիրել է տեսանյութը, եկել է այն եզրակացության, որ դաշտային հրամանատարի ձեռքն ընկած օրգանը թոքի մի հատված է:
Խալիդ Ալ-Համադը լրագրողներին բացատրել է, թե ինչն է դրդել նրան ծաղրելու զինվորի դին: Նրա խոսքով՝ սպանությունից հետո երբ գրոհայինները գտել են նրա բջջայինը, իրենք հայտնաբերել են ամբողջովին մերկ կնոջ ու երկու երեխաների մասնակցությամբ տեսագրություն: Հեռախոսի տերը նվաստացրել է նրանց, փայտով հարվածել բոլոր տեղերին: Տեսագրությունը զայրացրել է նրան, և նա որոշել է վրեժխնդիր լինել Բաշար Ասադի բանակի կողմից սպանված բոլոր երեխաների ու բռնաբարված կանանց համար:
Տեսագրությունն արդեն արժանացել է Human Rights Watch իրավապաշտպան կազմակերպության, ինչպես նաև ապստամբների ներկայացուցիչների քննադատությանը:
